Diha toy panahon diin ang tartanilla maoy giilang “hari sa karsada.” Unya nangawa ang tartanilla ug gibansan og mga de pasaherong jeepney.
Ug karon ang mga motorsiklo nasad ang mipadung sa pag-ilog sa korona isip “hari sa karsada.”
Nagkadaghan na ang mga motorsiklo. Ug modaghan ug modaghan pa gyud kini tungod kay ning panahona ang usa ka tawo sayon ra man makaangkon og motor kay dili man bug-at ang presyo niini.
Daghan nang mga drayber sa mga kotse, trak, van, etc. ang nangreklamo ning pagdaghan sa motorsiklo diin ang pipila niini gimanehog mga tawong dili kamao mosunod sa mga lagda sa trapiko.
Husto si Eladio C. Dioko, kolumnista sa The Freeman, nga panahon na nga ma-regulate ang operasyon sa mga motorsiklo (ug bisikleta ug trisikad) samtang wala pa moabot ang problema sa punto nga lisud na sulbaron.