EDITORYAL - Delikado baya ang series lights

Ang atong kabomberohan miawhag sa katawhan ning panahona sa pagtuman sa mga lagda sa gitawag nga “fire safety” aron walay mahitabong disgrasya ning atong pagsaulog sa Kapaskohan.

Alegre kaayo ang pagpangandam sa katawhan alang sa Pasko. Nagkalain-laing kolor ang mga adorno kon dayandayan sa mga panimalay diin ang electric lights maoy gigamit.

Nindot. Hayag. Nakahatag og kalipay bisan pa sa kapait karon sa kinabuhi. Apan gikinahanglan ang maayong pag-atiman niining maong mga dekorasyon.

Matud pa ni FO1 Wendell C. Villanueva, BFP, sa iyang lindog “Nagbagang Kasayoran” sa Banat News, dakong peligro kun dili makontrolar ang paggamit sa Christmas series lights.

Ang series lights nindot tan-awon apan nagkinahanglan kini og subsob nga pagbantay kay makamugna kini’g sunog kun dili husto ang paggamit niini.