Reserbang Ligid

Gikan sa cellphone number 0920-6957155: "Good day, Sir. Naa  unta koy ireklamo. Kana bang mga jeep nga pasaheroan nga mobiyaheg Inayawan-Colon, ang ilang reserbang ligid ila mang ibutang ilawom sa lingkoranan. Lisod kaayo ang paglihok ug paglingkod." -- (Sent 02:32:39 pm -- October 10, 2007)

Dili lang ang mga PUJ nga mobiyaheg Inayawan-Colon nga rota ang naghimog ingon niini. Hasta sab ang mga PUJ nga nagbiyahean sa ubang mga rota. Tinuod nga makahatag kinig inconvenience sa mga pasahero, labina kun apiki nang daan ang espasyo sulod sa sakyanan. Makahasol, labinag babaye ang pasahero.

Kun wala ko masayop, gitun-an na sa mga opisyal sa dakbayan sa Sugbu ang bahin niini. Dinha kadtoy hugonhugon nga did-an na ang mga PUJ sa pagbutang og ligid sulod sa sakyanan. Posibleng ipatuman kining maong pagdili pinaagi sa usa ka ordinansa. Atong paaboton kun unsay resulta.

Ambot kun nganong sa sulod sa sakyanan man gyod ibutang nila ang ligid nga mahimo ra man unta kun anha kini ikabit sa kilid sa sakyanan dapit sa lingkoranan sa driver o sa luyong bahin dapit sa may pultahan. Mosamot og kaapiki ang sakyanan ug hasol para sa pasahero nga may dalang mga kinompra o bagahe.

* * *

Sa laing bahin: "Usa ko ka sumasakay makaadlawon padulong sa Carbon kay mangompra. Usahay naa koy makasakay nga mga badlongon sa katilingban. Ang usa sa upat nila magdalag dako nga bag. Kun naa na silay biktimahon ilang ipatung-an. Unya ang ilang mga kauban magsaba-saba pag-ayo aron ang atensiyon sa ilang buot biktimahon adto na sa ilang kauban. Taudtaod manganaog kadtong mga tawhana. Unya ang kadtong nabiktima mangita na sa iyang cellphone. Nakuha na diay sa upat. Sagad mag-atang na sila sa jeepney stop." -- 0905-7736001 (Sent: 01-40:50 pm -- October 10, 2007)

Daghang salamat sa kasayoran nga imong gihatag. Hinaot unta nga pinaagi niini makabantay ang atong kaigsuonan sa modus operandi sa mga badlongon sa katilingban. Angay gyod magmaigmat kanunay ang mabuot nga mga lungsoranon.

(Sumbong ug reklamo? Text at 0910-8105522)