EDITORYAL - State of Calamity

Suwat nga atong nadawat gikan sa usa ka ginikanan nagkanayon nga “husto ang desisyon sa Konseho sa pagpasar niining resolusyon diin gibutang ang siyudad ubos sa state of calamity tungod sa nagkadaghang kaso sa dengue.”

Apan matud niya dili lang dengue ang calamity nga miigo sa dakbayan kundili kini usab ang mga “dugoong binuang” sa mga killers nga nagkadaghan na karon.

Ang labing ulahing kaso sa pagpamatay mao kadtong gihimo sa duha ka tawo nga nagsakay og motorsiklo ug mipatuyang lag pamusil kutob sa ilang hisugatan sa kadalanan. Tulo ang patay, upat ang naangol.

Tuod man usa usab ka dakong kalamidad ang mga dugoong kalihukan sa mga badlongong sakop sa atong katilingban -- diin mga miyembro sa fraternity ug gang ang mga suspek.

Ug matud pa gani sa usa ka tigpaniid, mas kuyaw pa sa dengue kining mga notoryus nga sakop sa pipila ka fratmen ug gangmen (gangsters) nga mituok sa komunidad atol sa kagabhion.