Gitay-og sa linog ang pipila ka mga dapit sa nasud ning milabay’ng mga adlaw. Dili hinoon kusog nga mga linog kay gani ang balita bahin niini gilubong ra man sa inside pages sa mga pamantalaan.
Apan bisan pa, kinahanglan nga mangandam ang kagamhanan kay ang Pilipinas ra ba anaa sa ilang gitawag nga “Ring of Fire” kon dapit diin kanunay’ng bisitahan sa linog.
Daghan nang mga lugar sud niining “Ring of Fire” ang naigo na sa dagkong linog diin midala kini og tidal wave ug tsunami.
Dili man kapugngan ang linog — di sab kini matag-an kun asa ug kanus-a moigo — kay ang maong katalagman iya man sa kinaiyahan apan angay lang gayud ang pagpangandam sa tanang higayon.