EDITORYAL – Ang pag-atiman sa skywalks

Makapila na kami misugyot nga ang mga skywalk sa dakbayan ipaubos sa pag-atiman sa mga opisyal sa barangay.

Karon among gikalipay nga si Guadalupe barangay kapitan Jingjing Faelnar kinsa mao say pangulo sa Association of Barangay Councils nagtuo usab diay nga mas maayo kun ang mga opisyal sa barangay maoy paatimanon sa mga skywalk diha sa ilang isigka-hurisdiksyon.

Si Faelnar miluwat og usa ka memorandum diin iyang giawhag ang mga opisyal sa barangay pag-atiman sa mga skywalk sa ilang teritoryo.

Dako kaayong kahigayunan nga kining mga reklamo batok sa mga tawo nga mihimo sa skywalk nga ilang pinuy-anan ug batok usab sa mga vandal masulbad na kun tumanon sa mga opisyal sa barangay ang tahas nga gihatag kanila ni Faelnar. Kini tungod kay naa sa ilang tugkaran ang butang nga ilang pagabantayan.