Usa ka newsphotographer sa usa ka inadlaw’ng pamantalaan dinhi sa Sugbu ang gikulata sa way kukalooy sa mga dumadapig sa usa ka politiko sa Bogo adtong miaging adlaw.
Si Alex Badayos, photo chief sa Sun*Star Cebu, miadtog Bogo aron sa pagkober sa politikanhong kalihukan didto kalabot sa nalangay nga pagproklamar sa mananaug sa eleksyon sa pagka-kongresista sa kuwatro distrito.
Report nga nadawat nato dinhi sa Banat News nagkanayon nga si Badayos gigang-apan sa mga tigas nga dumadapig sa kampo sa mga Martinez ug sa way pugong-pugong ilang gikulata ang gihisgutang sakop sa media, kinsa maayong pagkabun-og.
Nangayo nag pasaylo si Bogo Mayor Junnie Martinez bisan matud niya wa siya masayud sa nahitabo. Apan kinahanglan gayud nga dunay subsob nga pagsusi sa nahitabo ug ilhon gayud ang responsabli sa pag-ataki kang Badayos ug pahamtangan og nagkaigong silot.