Ang estilo mao nga diha sa e-mail nga imong madawat, isaysay sa nagpadala ang iyang kahimtang. Magpaila siya sa usa ka partikular nga ngalan, nga ambot kon mao ba gayod kini ang tinuod nga ngalan. Taga South Africa kuno siya. Ug ilo nang tuwapos. Ang iyang amahan napatay sa giyera sa Gulpo ug ang iyang inahan namatay dili pa (kuno) dugay.
Lisod (lain pa kuno) ang iyang kahimtang karon. Aduna untay duha ka account sa bangko ang iyang mga ginikanan pero dili kini niya ma-withdraw tungod kay na-frozen kini. Tungod niini, mohangyo siya kanimo sa ngalan sa Ginoo, nga unta mosugot ka nga maoy pabarogon niyang beneficiary aron ma-withdraw na niya ang dako kaayong kantidad sa duha ka bank accounts sa iyang mga ginikanan.
Aron paghingpit sa proseso, padepositohon ka og kantidad (linibo) sa usa ka partikular nga bank account nga iyang ilatid sa iyang e-mail kanimo. Kabahin (kuno) kini sa proseso aron mahimo kang opisyal nga beneficiary niya. Sa higayon nga ma-withdraw na niya ang kuwarta sa bangko, hatagan ka (kuno) niyag 40% sa kinatibuk-ang kantidad nga iyang makuha. Ug kinsay dili motingkag ang dalunggan nga binilyon man ang kuwarta sa bangko nga iyang hisgotan?
Pero ayaw gayod kamo pailad niini. Usa kini ka matang sa modus nga nakabiktima na og daghan. Busa pagbantay kamo aron dili mausahan sa mga badlongon sa katilingban sama sa responsable sa paghimo niining maong estilo sa modus operandi.
Sa laing bahin: "Lisod pag-control sa traffic diha sa Laray San Roque. Politika tingali ang hinungdan. Ang kapitan lain og partido. Ang konsehal nga chairman sa peace and order lain sad og partido." -- 0916-8249575
Dili lang una ko mokomentaryo bahin niini. Ang akong ikasulti mao nga mas maayo nga ipadaplin lang una ang politika.
(Sumbong ug reklamo? Text sa 0910-8105522).