Libro sa kinabuhi ni Chief Justice Davide

Ugmang adlawa, usa ka book-launching ang ipahigayon sa Southwestern University mahitungod sa libro bahin sa kinabuhi ni Chief Justice Hilario Davide Jr. Giulohan kini ug "DAVIDE An Unauthorized Biography" ug gisulat ni Dean Antonio R. Tupaz uban sa Foreword ni Maximo V. Soliven.

Gisaysay sa maong libro ang publiko ug pribadong kinabuhi sa kanhi Chief Justice sa labaw'ng hukmanan, ug karon Ambassador sa United Nations. Gisulat sa maong libro ang iyang mga paningkamot ug mga pakigbisog. Dili lang ang iyang mga kalampusan isip usa ka ligdong ug utokan nga abogado, magbabalaod, Chairman sa COMELEC ug hurado. Dili lang ang mga sulundon niyang mga binuhatan isip alagad sa gobyerno. Kondili gisaysay usab sa maong libro kon giunsa niya pagmahal ang iyang kagikan nga mao ang Argao, Cebu, nga bisan diin na lang siya moabot tungod sa iyang mga naaning kadaugan, wala gyud niya biyai. Kon giunsa niya pagmahal ang pagtikad sa yuta ug pagpananom, nga bisan sa iyang kadaghan og gimbuhaton ug kataas sa iyang posisyon, nagpabilin siyang suod ug mahigugmaon sa yuta.

Una kong nailhan ang kanhi Chief Justice dihang nangampanya pa kami sa Pusyon Bisaya niadtong 1978. Kami ni Ricky Poca kaniadto ug uban pang mga estudyante sa Political Science, daan na namong gi-idolo si "Atty. Jun Davide" kay bisan kaniadto pa, giila na ang iyang kaligdong ug ka-utokan. Wa gani ko magtuo nga mahinumdum siya kanamo kay natural ra man sa eleksyon nga daghang dumadapig nga imong mahimamat. Apan nasayop ko kay dihang mipanaw ang akong usa ka igsoon pagka-1980, nagpadala gayud sila ni kanhi Assemblyman Corominas og card ug hinabang, tungod kay ilang nabasahan sa usa ka obituary sa newspaper.

Nakahigayon ako pagbasa ug pipila ka panid sa biography ni Chief Justice Davide. Nindot kaayong pagkasulat. Daw dili ka ganahan nga moundang pagbasa. Mahulagway gyud nimo pinaagi sa mga pulong ni Dean Tupaz kon unsa ka unique ug awesome ang karakter ug pagkatawo sa kanhi Chief Justice. Apan imo usab nga mahulagway nga si Hilario Davide Jr. dili si Superman. Wala siyay ekstraordinaryong gahom o magic nga makahimo og milagro. Ordinaryo lamang kaayo ang iyang mga kagikan ug pamilya. Kon mosulti-sulti, manglihok - lihok, kalma kaayo ug wala gyuy ere. Apan gidayeg ug gipangga siya tungod kay sa iyang pagkatawo, nagbaton siyag mga kalidad nga dili ordinaryo. Ang iyang mga binuhatan dili ordinaryo. Naghupot siyag mga hiyas ug katakos nga lisud hitupngan.

Mao kini ang usa sa hinungdan nga lisud buhian ang maong libro kon masugdan na og basa. Gawas nga nindot kaayo ang pagkasulat ni Dean Tupaz, ang subject sa libro mismo interesting kaayo. Dili tungod kay siya si Superman. Kondili tungod kay siya usa ka ekstraordinaryong anak sa Sugbo nga nakakab-ot sa mga ekstraordinaryong kalampusan bisan pa sa pagpakabuhi sa ordinaryong paagi ug walay daghang gimik. Ug tungod sa pagsaysay sa iyang mapaubsanon nga kinaiya ug pamatasan, maka-relate ka sa iyang estorya sa kinabuhi. Daw usa lamang siya kanato. Kitang mga ordinaryong tawo nga nagpadayong nakigbisog ug nangandoy ma-charmed gayud. Sa maong libro, gihisgutan ang iyang pagka-simple nga tawo. Wala siyay gisaligan nga katigayonan, poder, armas. Apan nagpabilin siyang ligdong, walay gikahadlokan ug dili ordinaryo nga katakos. Tungod niini, milutaw gihapon ang tinuod nga brilyante nga mao si Hilario Davide Jr. Bisan asa siya ibutang. Ma-Kongreso. Ma COMELEC. Ma korte Suprema. Ug karon, ngadto na gayud sa United Nations.

Alang kanako, wala nato gikinahanglan ang usa ka Superman aron mamahimo natong idolo. Dili na kita angay nga molantaw didto sa layo kay ania ra uban kanato, usa usab ka Sugboanon, ang tinuod nga idolo nga atong gikinahanglan. Grounded. Centered. But extraordinary. Mao kini ang atong gipasigarbo, gipangga ug gitahod nga kanhi Chief Justice Hilario Davide Jr.

* * *

Alang sa inyong mga komentaryo, palihug e-mail sa [email protected] o text sa 0915-5536986. Daghang salamat.