Mga haligi ng tahanan

Ngayo’y kaarawan ng lahat ng ama
Kaya ang parangal kanila na muna;
Kahi’t ang ama ko ay di ko nakita
Kanyang kabutihan laging alaala!

At sino ang anak na hindi gagalang
Sa maraming ama sa sandaigdigan?
Sila ang haligi ng mga tahanan
Sila’y halimbawa at laging patnubay!

Sila’y mga amang kung wala ang ina
Ay silbing ina rin sa anak na sinta;
Lagi nang karamay sa ligaya’t dusa
Nitong mga anak kahi’t ilan sila!

Mayro’ng mga amang maagang nab’yudo
Sa mga problema’y nag-aasikaso;
Kung ang mga anak ay lulong sa bisyo
Ama’y nagsisikap sila’y mapanuto!

At may mga amang ang inaambisyon
Ay magandang bukas ng anak na maton;
Anak na naligaw sa pinaparoon
Pagtuwid ng landas ama ang katulong!

Kung minsa’y may amang iba ang nilandas
Kaya itinakwil ng buong mag-anak;
Ang amang ganito’y kinilalang hudas
Kaya di sinundan ng mabuting anak!

Dahil sa masama ginawi ng ama
Mga anak niya’y nag-iba ng linya;
Naging matagumpay mga anak niya
Ang buhay ng ama’y challenge sa kanila!

Mabuti’t masama ang ama ng tao
Sila’y dapat lamang dakilain ninyo;
Ama ng daigdig ay Dakilang Kristo
Ama ay nilikha na kahawig Nito!