Target shooting

Katungdanan ba god sa huwes ang pagpaninguha nga mailhan kon kinsa ang "mastermind" sa pagpatay ni Allan Dizon?

Kon kamo ang akong pangutan-on, unsay inyong tubag? Nangutana ko niini tungod kay dunay ubang mga radio announcers nga miingon "Wala g'yod maprobar sa huwes kon kinsa ang mastermind sa pagpapatay ni Dizon."

Akong klarohon nga dili trabaho sa huwes ang pagpaninguha nga mailhan kinsa ang utok sa usa ka krimen. Trabaho kana sa prosecution, nga sa ato pa fiskal nga gidistino sa korte ug sa mga private lawyers.

Ang huwes igo ra magpaabot kon unsa ang ipresentar nga ebidensya sa duha ka party ug maoy iyang timbang-tabangon. Mao na diha nga kon hinay ang abogado sa usa ka party, bisan og nasayod pa ang huwes nga dunay kuwang, dili siya manghilabot.

Ang tinuod, sibaw kaayo ang mga tabi-tabi kon kinsa ang nagpapatay ni Allan Dizon apan akong klarohon nga wala g'yoy ebidensya nga molambigit kaniya.

Bisan kadtong tawo nga giingong wala maghubo sa iyang helmet nga kauban ni Dodong, dunay mga tabi-tabi nga akong nadunggan kon kinsa kadto, apan sama sa gihapon dili kini mobarug sa hukmanan.

Ang tinuod, dili pa hingpit ang kalipay ni Amelina Dizon, ang asawa ni Allan kay duna pay kahigayonan nga mausab ang hukom sa kaso didto sa Court of Appeals.

Kon sustinihan man sa Court of Appeals ang hukom sa regional trial court nga nagpahamtang og death sentence ni Dodong Belandres, sigurado ko nga ang iyang mga abogado mosang-at gihapon sa kaso didto sa Supreme Court.

Nakabantay tingali kamo nga wala g'yod ko mag-apil-apil sa pagtuki niining maong kaso. Gituyo nako kini kay kami si Allan Dizon ug si Dodong Belandres nagpuyo sa usa lang ka barangay.

* * *

Daghan na ang mipadayag og tinguha nga mosalmot sa pagahimoong Gun Handling seminar alang sa mga sakop sa media dinhi sa Sugbo karong adlawa.

Gitug-anan ko ni Joy Tumulak, ang presidente sa Association of Beat Reporters of Cebu nga daghan ang moapil sa seminar nga sugdan karong buntag.

Maayo. Nindot kini kay ang mga sakop sa media nga hilig kaayong magdala-dala og armas, makamao na mogamit, ilabi na ang pagpunting.

Apan tukma ba god kon ang usa ka sakop sa media magdala-dala og armas nga walay lisensya? Sigurado ko nga ang inyong tubag "dili" g'yod.

Taas kaayo ang higayon nga gihatag sa kapolisan ngadto sa mga tawo nga naghupot og armas nga walay lisensya aron kini mapalisensyahan. Apan gikan sa Pebrero hangtod sa Septembre 30, daghan ang wala lang magtagad.

Ang pagamit og mga Memorandum Receipts (MR) nga giisyu sa mga police ug military units aron kunohay nagpakita nga ang armas iya sa kagamhanan, dili gihapon tukma.

Kon basahon nimo pag-ayo ang Executive Order 222 nga giisyu sa Malacañang, gidid-an ang mga police ug military commanders, apil na ang mga pangulo sa lainlaing mga government law enforcement units, pag-isyu sa maong papeles sa mga sibilyan.

Pananglit estriktohon g'yod pag-ayo, daghang mga tawo ang madakpan kay ang ilang armas dili lisensyado ug gigamitan lang og MR.

Ang serial numbers sa maong mga armas dili nimo makita sa "master list" sa mga armas nga iya sa maong police ug military units.

Bisan og wala ko'y armas apan moapil ko sa gun handling seminar karong adlawa adto sa Kamagong Gun Club nga dumalahon sa KBP nga gipangulohan ni Edward Abad ug sa usa ka US-trained nga gun expert.