PILANTIK - Walang dungis

Malapit na naman ang halalang lokal
mga kandidato’y kanya-kanyang hanay;
Nasa administrasyo’y hindi mapalagay
takot na matalo’t mapugayang-dangal!

At sa Muntinlupa — lungsod na maunlad,
iisang distrito’y daming naghahangad
Kandidato rito ay si Bunyong tanyag
di pa matatalo sapagkat matapat!

Ang rekord ni "Toting" ay napakaganda
at sa mamamayan lubhang mahal siya;
Kung may kakalaban ay mag-isip muna
pagkat isang pader babanggain niya!

Sapul nang maupo si "Toting" sa Congress
marami nang batas siyang naisulit;
Mga batas itong sa baya’y tangkilik
pag-unlad ng bansa ang doo’y kalakip!

At sa Muntinlupa ang kanyang pangalan
hindi nagkadungis — hindi nagalusan;
Ang graft and corruption kanyang nilabanan
kaaway din siya ng buktot at hibang!

Kaya nga sa ngayo’y mahirap talunin
ang lalaking itong may diwang magiting;
Doon sa Kongreso’y kilala’t magaling
laging nangunguna sa gintong gawain!