Lahi nga klase sa pawikan nakit-an diha sa barangay Ermita

CEBU, Philippines — Duha ka giingong Chinese softshell turtles (Pelodiscus sinensis) ang nasigpatan sa mga bata sa batuon nga baybayon sa Barangay Ermita sa Dakbayan sa Sugbo niadtong Miyerkules, Hulyo 22, 2026. Gituohang naanod ang mga pawikan human sa kusog nga bul-og sa tubig baha nga miigo sa maong lugar human sa grabeng pag-uwan niadtong Martes.

Daghang residente ang nagpundok aron motan-aw sa talagsaong pawikan samtang giampingan sa mga bata ang mga pawikan ug gisulod sa plastic bottle.

Ang Chinese softshell turtle usa ka matang sa freshwater turtle nga mailhan tungod sa humok nga kabhang ug taas nga liog. Giingon nga dili kini gikan sa Pilipinas ug giila isip usa ka “invasive species”. Matud sa mga eksperto, posible kini nga magdala og kagaw ug mahimong makadaot sa lokal nga ecosystem pinaagi sa pakigkompetensya sa mga lumad nga pawikan alang sa pagkaon ug puy-anan.

Apan matud pa sa The Freeman photographer nga si Aldo Banaynal kinsa mao ang nakasaksi sab sa presensya sa duha ka pawikan nga gibuhian ra sab sa mga bata tungod kay wala silay kalibutan unsaon pagbuhi ang maong matang sa hayop.

Ang Cebu City Environment and Natural Resources Office (CCENRO) miingon nga wala makadawat og taho ang ilang buhatan gikan sa barangay apan mipahimangno sa mga residente nga kung adunay laing presensya sa mga pawikan, ipahibalo kini dayon sa barangay aron mao kini ang moreport sa ilang buhatan ug sa Department of Environment and Natural Resources aron masiguro nga luwas ang pagdumala sa mga hayop ug matugyan kini sa husto nga mga awtoridad.

Suma sa DENR nga kinahanglan pa sab kini nga isang-at ngadto sa technical division aron nga marespondehan ug magpahigayon og inspeksyon sa Ermita ug sa mga kasikbit nga mga barangay. — (BANAT NEWS)