Utang sa MCWD
Wala na bay kuwarta ang Metro Cebu Water District (MCWD)? May sukaranan bang mga pasidaan nga mabangkarota ang MCWD tungod sa kuwestiyonableng mga kontrata nga gisudlan ni kanhi MCWD chairman Joey Daluz?
Bisan sa pasalig sa management nga abunda ang ilang panudlanan, kasaligan namong tinubdan nibutyag nga wala makabayad ang MCWD sa ilang bulk water suppliers. Gani, pipila sa pribadong mga kompaniya nihulga sa pagpasaka og mga kaso sa korte kon dili mabayran ang nagkadakong utang karong buwana.
***
Nakakuha mi og kopya sa tulo ka demand letters nga gipadala sa Pilipinas Water Resources, Inc. (PWRI) nga ni-detalye sa ?388 milyones nga utang sa MCWD:
• Ang Opao Injection Point nga nagsugod pagsuplay sa MCWD niadtong Mayo 2024 dunay kolektahunon nga ?238 milyones;
• Ang Mambaling 3 Injection Point nga nagsugod pagsuplay sa MCWD niadtong Hulyo sa niaging tuig dunay kolektahunon nga ?134.5 milyones; ug
• Ang Mambaling 1 Injection Point nga nagsugod pagsuplay sa MCWD niadtong 2018 dunay kolektahunon nga ?15.3 milyones.
***
Segun sa nagpakabana nga mga opisyal sa MCWD ang PWRI usa sa labing gamayng suppliers sa MCWD. Gikuyawan silang naghunahuna pila na ang kinatibuk-ang utang sa MCWD kon wala sab mabayri ang mas dagkong bulk water suppliers.
Niadto pang 2023 nipasidaan silang MCWD Board Members Danilo Ortiz ug Earl Bonachita sa kabug-at sa obligasyon sa pataka nga mga transaksiyon nilang Daluz ug kaubanan nga mahimong ipasa ngadto sa mga konsumidor: ?3 bilyones sa mosunod nga 29 ka tuig.
***
Giila nilang Ortiz ug Bonachita ang kinadak-ang suppliers sa MCWD: Inayawan Desalinated Seawater, Marigondon Desalinated Seawater, Canjulao Bulk Water Supply, Opao, Mandaue City Bulk Water Supply, Lusaran River Bulk Water Supply, Basak, Lapulapu Bulk Water Supply, ug Mambaling II Potable Bulk Water.
Kanus-a man itug-an sa MCWD ang tinuod nga kahimtang sa ilang panalapi? Gitunol na ba nilang papeles nga hagbay rang gipangayo sa Cebu City Council ug gideklarar sa Cebu City Legal Office nga public documents? Kapin sa gatos ka adlaw na sa iyang puwesto si Mayor Nestor Archival, unsa na may iyang nahimo pagtuman sa saad nga ibisto ang mga anomaliya, tarungon ang operasyon ug palambuon ang serbisyo sa MCWD?
- Latest
