Lana biktima sab sa pandemiya
Ang dugay rang gihugunhugon sa kataposan giangkon na gyod sa Organization of Petroleum Exporting Countries (OPEC) nga sud sa daghang katuigan nagpiyesta sa dakong kita sa lana: Mohunong na og tubo ang kalibotanong konsumo sa lana napu ka tuig gikan karon ug dayon magsugod na og tidlom.
Nikumpisal ang OPEC nga mas paspas ang pagtibugsok sa paggamit og lana sa nagkalainlaing kanasuran sa kalibotan, nga gipangagpas na sa nangagi pang katuigan human sa paspas nga paglambo sa alternatibo nga mga tinubdan sa enerhiya, tungod sa pandemya sa Covid-19.
* * *
Nangagpas ang OPEC nga ang konsumo sa lana mosaka ngadto sa 107.2 milyones ka baril matag adlaw sa unang unom ka buwan sa tuig 2030 gikan sa 90.7 milyones ka baril karong tuiga. Apan sa ikaduhang bahin sa tuig, magsugod na og hinay ang paggamit sa lana.
Gipasabot sa OPEC nga ang pagluhod sa kalibotanong ekonomiya tungod sa COVID-19 mosangpot sa mas lapad ug mas malungtaron nga kausaban sa paghimo sa mga patigayon ug sa mga taras sa mga konsumidor.
* * *
Gipaabot nga mosaka ang konsumo sa lana sugod sa sunod tuig aron pagpadagan sa mga awto ug mga trak ug mga pabrika sa pagbalik og baskog sa mga ekonomiya sa kanasuran kon duna nay bakuna ug mga tambal batok sa COVID-19.
Apan nabalaka ang OPEC nga mapapas ra kay human sa pandemiya gipaabot nga mahimo nang permanente ang pagtugot sa mga kompaniya nga ang ilang mga trabahante magpabilin na lang sa ilang mga pinuy-anan ug ang mga tigom nga mas sayon ug mas mapuslanon nga mapahigayon online. Busa maibanan ang minilyon ka pasahero ug mga biyahe sa kadalanan.
* * *
Giisip sa OPEC nga laing dako nga hulga sa industriya sa lana mao ang pagsulbong sa demanda sa electric cars, tungod sa padayong paglambo sa teknolohiya sa mas barato ug mas taas og lahutay nga mga baterya, mas madaginutong mga paagi sa pagkonsumo sa lana ug ang pagmenos sa mga biyahe sa mga ayroplano sa kanasuran alang sa patigayon ug turismo bisan human sa pandemya.
Masaligon hinuon ang OPEC nga di mapapas ang lana. Kay magpabilin gihapon nga kinadak-ang bahin sa mga tinubdan sa enerhiya.
- Latest
