Inutil batok sa saba-saba
Di ni unang higayon nga nangisog si Cebu City Mayor Tommy Osmeña batok sa pagsaba-saba sa lawom nang gabii. Sa wa pa mopasidaan pagtangtang sa allowances sa mga polis nga mapakyas pagbadlong sa mga videoke ug diskoral sa ilang mga hurisdiksiyon nga maabtan og kadlawon, niluwat sab siya og samang pasidaan batok sa mga barangay tanod niadtong Pebrero.
Nihimo siya og mas radikal nga lakang pila ka tuig ang nilabay. Sa wa pa mauso ang Facebook ug text messages nga maoy tinubdan sa mga reklamo nga nakaaghat niya pagbanhaw sa kampanya.
***
Nangreklamo sa grabeng kasaba sa mga videoke sa mga tindahan sa dan B. Rodriguez ang mga pasyente ug mga mananambal sa Vicente Sotto Memorial Medical Center ug Cebu Puericulture Center and Maternity House. Nabawo ang ilang gipalihug pagsumbong sa mga polis kansang presinto diha pa duol sa Fuente Osmeña.
Dayong tungang gabii nakaabot ang ilang reklamo ni Mayor Osmeña. Kinsa wa mag-usik og panahon. Human lang sa pila ka gutlo nahilom ang nagyagaw'ng videoke. Dungan sa pagkapawong sa mga suga. Gipaputlan niya og kuryente ang mga tindahan nga gipanag-iya diay sa mga polis.
***
Mas klaro ang ordinansa sa Dakbayan sa Sugbo batok sa saba-saba. Ang Ordinance No. 309 nidili sa videoke ug ubang saba nga kahimanan gikan sa alas-7 sa gabii hangtod sa alas-5 sa kadlawon. Giusab ini ang karaang Ordinance No. 1940 nga nidili sa saba-saba gikan sa alas-9 sa gabii hangtod sa ala-1 sa kadlawon.
Way susamang lagda ang ubang local government units sa Sugbo. Apil nang among lungsod sa Consolacion.
***
Way tarung kinatulgan ang among mga silingan tungod sa lagubo sa diskoral sa Sitio Kalubihan sa Barangay Poblacion Occidental nga nilungtad hangtod sa alas-2:30 sa kadlawon. Matod ni Barangay Kapitan Hercules Aligno gitugotan niyang diskoral hangtod sa alas-2 sa kadlawon kay maoy naandan sa nangagi pang mga tagduma sa barangay.
May ordinansa ang Consolacion nga nagtakda nga kutob ra sa alas-11 sa gabii ang mga videoke. Ilang ordinansahon batok sa diskoral gisalikway sa Cebu Provincial Board. Kansang mga sakop gikataho nga nihupot sa binuang nga baruganan nga ang saba sa pipila mahimong di saba sa uban.
- Latest
