Buslot sa GrabCar
Drayber sa GrabCar nga akong nasakyan niadtong weekend nitahan sa bangko sa ikaduha niyang sakyanan dihang nihunong ang Uber sa ilang operasyon sayo ning buwana. Nahadlok siya nga di na makasugakod sa binuwan nga bayranan kon GrabCar na lang saligan.
Nagparehistro siya sa Uber ug GrabCar. Gipilian lang niya unsa nga app ang gamiton agad sa oras sa adlaw o sa gabii ug sa bahin sa Metro Cebu nga iyang nahimutangan. Natagbaw siya sa kita nga nakahukom sa pagbiya sa iyang trabaho sa call center ug pagpangutang og ikaduhang sakyanan.
***
Sa pagkawagtang sa Uber, nitidlom ang iyang kita. Mao nga gipasabot ang drayber sa ikaduha niyang sakyanan nga di na sila mabuhi kon padayon nga magbahin sa mas ubos nga kita. Gihulagway niya ang mga bentaha sa Uber:
•Mas dako ang cash incentive nga ilang nadawat bugti sa paghingpit og 100 ka biyahe sa matag semana;
•May bahin sila nga P75 sa cancellation fee nga P100 nga ipahamtang ngadto sa pasahero nga niusab sa iyang hunahuna o wa kapaabot nila; ug
•Mas daghang langyaw nga mga pasahero ang naka-book nila.
***
Gitataw sab niya nga mas hinog nang teknolohiya sa Uber kay mas una silang nagsugod sa mas daghang kanasuran kon itandi sa GrabCar nga nia ra sa pipila ka bahin sa Asya. Matod niya mas lisod tikasan ang app sa Uber sa mapahimuslanong mga drayber. Sama nga mas luwas ug mas makiangayon sa mga pasahero.
Matod niya dakong buslot sa app sa GrabCar ang pagpahibawo sa mga drayber sa destinasyon sa mga pasahero. Busa mahimo silang magpa-goryo-goryo kon layo ug mingaw ang padulngan.
***
Bisan nipadaplin nang Uber bugti sa kabahin sa pagpanag-iya sa GrabCar dinhi sa Southeast Asia, mahimong wa ipagamit ang mas abante nilang teknolohiya. O ang GrabCar mao'y nibalibad sa paghimo sa ilang app nga mas makiangayon sa mga pasahero.
Niining pagtumaw sa sibaw nga mga reklamo sa pangabuso sa mga drayber sa GrabCar, mas maayo tingaling tutokan pagbalik sa Land Transportation Franchising and Regulatory Board kining depekto sa app nga nakapatental sa mga drayber sa GrabCar pagsunod sa salbahis nga taxi drivers nga magpili og mga pasahero.
- Latest
