Nonoy nahimong Nona
Giusab sa Philippine Atmospheric, Geophysical and Astronomical Services Administration ang ngan sa labing bag-ong bagyo nga nisud sa Philippine Area of Responsibility, nga gipangagpas nga mao nay kataposan karong tuiga. Ginganlan nilang bagyo nga "Nonoy" hangtod sa ilang forecast dayong tungang gabii niadtong Biyernes. Apan dihang nakasud na sa PAR gahapon sa kadlawon, gitawag na nilang "Nona."
Duha ang rason nga gihatag sa weather forecasters nga nahinabi sa DYAB Radyo Patrol: Una, agi og pag-respeto ni Presidente Noynoy Aquino (hinaot nga di mainsulto ang mga may ngang "Nona"); ug ikaduha, naklaro sa ilang models nga gawas nga mahimong mokusog ang bagyo motugpa pa gyod sa yuta sa mga lalawigan sa Samar o sa Bicol Region.
***
Maayo na lang nga wa modangop ang kadagkoan sa PAGASA sa teknikal nga lusot sa kausaban sa ngan sa bagyo. Technically, wa mausab ang ngan kay di man kahinganlan ang bagyo hangtod nga makasud sa PAR. Sa ato pa, hangtod nga nakasud sa PAR sa alas-4 sa kadlawon gahapon, ang bagyo nagda pa sa iyang international name nga "Melor."
Sa ato pa, sa labing unang kahigayonan nga kanganlan na nilang bagyo, "Nona" nay ilang gigamit. Apan ang PAGASA ra say niboluntaryo sa ngang "Nonoy" sa ilang forecasts sa umaabot nga bagyo sa pagsugod sa niaging semana. Gawas pa, di nila ikapanghimakak nga "Nonoy" ang naa sa ilang listahan sa mga bagyo karong tuiga.
***
Unang naggamit ang ngan nga "Nonoy" alang sa bagyo niadtong Septiyembre 2011, si Presidente Aquino nay nagtungkawo sa Malakanyang. Apan wa usba ang ngan tungod tingali nakasud sa tungod na sa Basco, Batanes, sa amihang tumoy sa Pilipinas, wa ka-landfall ug nigawas dayon sa PAR human lang sa pila ka adlaw.
Kon tumanon ang samang lista sa mga bagyo sa PAGASA, sunod nga magamit ang ngang "Nonoy" (kon di paundayonan ang inusab nga ngang "Nona" inig kanaog nang Noynoy sa Malakanyang) sa ika-14 nga bagyo sa 2019 ug 2023.
***
Ma-problema na sang PAGASA kon si kanhi Interior Secretary Mar Roxas ang modaog pagka presidente. Kay sa 2018, ikaduhang tuig sa pamunoan nga mopuli human sa piniliay sa Mayo sunod tuig, ang ilang listahan nagtakda nga ang ika-13 nga bagyo nganlan og "Mario."
Laing sukaranan sa pag-usab sa mga ngan nga naapil na sa listahan sa mga bagyo, gawas sa kasusama sa binunyagan sa mga opisyal nga dako og tingog sa dinaliang panginahanglan sa modernisasyon sa PAGASA, mao nga bangis kaayong bagyo ug makamugna og lapad nga kadaot. Maong wa nay umaabot nga bagyo nga nganlan og "Pablo" ug "Yolanda." Hinaot nga di manungog ang kinaiyahan paghatag og laing rason sa pag-retiro sa mga ngang "Nonoy" o "Nona."
- Latest
