Baratong lana sa katuigan
Human sa duha ka sunudsunod nga semana sa pag-usbaw sa presyo sa mga produkto sa lana, makaginhawa og luag ang mga motorista ug mga pasahero kay gipaabot nga motidlom na sab ang presyo sunod semana. Kini tungod sa nagpadayon nga pagbaha sa sobrang suplay sa lana sa merkado sa kalibotan.
Ang temporaryo nga pagsaka sa presyo sa lana sa niaging duha ka semana nanukad sa pag-us-os sa produksiyon sa lana sa Estados Unidos. Nga nakaaghat sa mga tigpaniid sa pagpangagpas nga nitahan nang shale oil producers, nga di mga sakop sa Organization of Petroleum Exporting Countries (OPEC), ug mahimong di na silang kalahutay sa padayong pagbarato sa lana.
***
Apan human sa duha ka semana nga pagdamgo sa mga nagsalig nga mabulukon ang umaabot nga Pasko alang sa kalibotanong industriya sa lana, nabantang ang di malalis nga kamatuoran: Bisan sa mas ubos nga produksiyon sa US, Rusya ug ubang non-OPEC oil producers, di pa mahurot ang gibanabanang kapin sa bilyon ka baril sa sobrang lana sa merkado.
Gipaabot nga ang sobrang suplay molungtad hangtod sa kataposan ning tuiga. Maong dako ang kahigayonan nga di nang kasaka pagbalik ang presyo sa lana hangtod sa pagtapos sa 2015. May mga pangagpas pa gani nga ang sobrang suplay maabtan pa gyod sa unang tulo ka buwan sa bag-ong tuig 2016.
***
Hinaot nga ang pagtidlom og sobra sa katunga sa presyo sa lana sukad sa 2014 makapakumbinser na sa transport sector sa paghunong sa di makiangayon nilang pag-insistir nga angayng usbawan ang plitehan sa mga sakyanang pamasahero. Hinunoa, angay nilang hangpon ang nag-ung-ong nga petisyon ni Kongresista Manny Iway atubangan sa Land Transportation Franchising and Regulatory Board paglaslas sa plitehan sa PUJs, taxis ug buses sa Sugbo ug ubang bahin sa Pilipinas.
Hinaot nga mahinayon nang pangagpas ni Iway nga aprobahan na sa LTFRB ang iyang petisyon karong buwana, o labing dugay sa di pang Pasko karong tuiga.
***
Ang bisan unsang nahibiling pagduda sa direksiyon sa presyo sa lana hingpit nang napapas sa deklarasyon sa International Monetary Fund (IMF) nga ang baratong lana magpabilin sa mosunod pang katuigan. Giawhag sa IMF ang mga nasud sa Middle East ug ubang mga sakop sa OPEC sa pagdawat sa kamatuoran ug pagsugod na og laslas sa ilang tinuig nga budget.
Usa sa maigo sa paghuyang sa mga ekonomiya sa mga nasud nga nagsalig sa lana mao ang Overseas Filipino Workers. Kansang dollar remittances nagsugod na og tidlom niadtong Agosto karong tuiga. Angayng tabangan sila sa gobyerno sa Pilipinas sa pagpangita og alternatibong mga panginabuhi sa ubang kanasuran nga wa maapiki sa baratong lana. Mas maayong mabalik sila dinhi duol sa ilang mga pamilya.
- Latest
