256 kbps ra, 80% pa
Human hulgaa sa mga senador nga laslasan ang ilang budget sunod tuig kon way himuon pagsulbad sa nagkamang nga internet connection sa Pilipinas, ang National Telecommunications Commission niluwat dayon og duha ka kamandoan:
•Una, nga magtakda na ang gobyerno og minimum broadband speed sukwahi sa gihimo karon sa higanteng mga kompaniya sa telepono nga nagsige lang og advertise sa ilang maximum speed; ug
•Ikaduha, ibutyag na sa telcos ngadto sa mga konsumidor ang ilang average data rates sa matag dakbayan o probinsiya.
Ang makapahibung mao nga inay modangop sa korte ug mangayo dayon og temporary restraining order (TRO), nga maoy kasagaran nilang gihimo, ang telcos nihangop sa kamandoan sa NTC.
***
Sa wa pa mahinayak og pakpak ang mga konsumidor sa memorandum nga giluwatan sa NTC niadtong Agosto 13, usa ka adlaw human naningil si Senador Bam Aquino sa ilang saad pagtakda og minimum internet speed, nabantang ang sidsid sa maniobra: Nakigsulti diayng daan ang NTC sa telcos sa wa pa itakda ang minimum broadband speed: 256 kilobits per second (kbps).
Samtang maayo na lang kay sa minimum speed karon, nga zero o itlog, kay may mga adlaw man gyod nga di maglihok ang atong koneksiyon, nitiyabaw ang pipila ka konsumidor nga ang 256 kbps labaw lang og gamay sa gikusgon sa dial-up duha ka dekada ang nilabay.
***
Wa gyod tingali sila magsabot kay managsama ang lusot sa NTC ug telcos: Di makiangayon nga sundon ang kalibotanon nga minimum speed nga 1.5 ngadto sa 2 megabits per second (mbps) kay may mga dapit sa Pilipinas nga wa pay igong kable nga kaagian sa mas paspas nga data rates.
Gimandoan na sila sa NTC sa di pagpangangkon og usa lang ka internet speed alang sa tibuok nasud. Apan wa ning kapugong nila pagpasalipod sa kahinay sa koneksiyon sa labing hilit nga kalungsoran aron paglusot sa makauuwaw nilang mga bulilyaso sa labing dagkong mga dakbayan sa Sugbo ug Metro Manila.
***
Garantiya ba ang bag-ong kamandoan sa NTC nga di na gyod mokaging ang atong internet connection? Di. Kay ang memorandum mismo sa NTC nihatag nang daan og lusot sa telcos: Ang minimum broadband speed nga 256 kbps mahimong tumanon lang og 80%, o 24 ka adlaw sa usa ka buwan. Mahimo gihapon tang hatagan og usa ka semana nga kalbaryo nga way bisan gamayng tulubagon ang telcos.
Nipasalig ang NTC nga mas subsob na silang maghimo og random speed test ug nihulga nga silotan ang telcos nga di kapasar. Naghimo na sila og speed tests sa una, ginamit ang pinaubsan nga standards, apan may telcos gihapong nahagbong. Nakatag-an ka, way nasilotan. Di makadasig ang record sa NTC pagpanalipod nato.
- Latest
