Lacson mayo nga anti-crime czar

Saludo kaayo ko ni kanhi senador Panfilo Lacson nga takus gyud kaayo mangulo og mga anti-crime groups. Sigurado ko nga mapuhag ang mga badlungon sa katilingban kon si Lacson hatagan og laing higayon nga makapangulo og grupo sama adtong Presidential Anti-Organized Crime Task Force.

Nakabasa man gud ko og report sa nasudnon nga mantalaan nga adunay misugyot nga si Lacson hatagan unta og katungdanan sa administrasyon ni Presidente Aquino nga makigbatok sa mga badlungon sa katilingban.

Utokan man gud si Lacson ug maghuna-huna gyud og mga paagi kon unsaon pagsumpo ang mga badlungon sa katilingban. Kanang iyang katungdanan karon nga paghimo'g lakang aron matabangan ang mga biktima sa katalagman, wala kaayo na maigo sa iyang abilidad.

Nagkaila mi ni Lacson diha nga una siya nga nadestino dinhi sa Sugbo kaniadtong 1989 isip commander sa Cebu Metro District Command nga, sa minubo pa, Cebu Metrodiscom. Ang iyang teritoryo abot sa lungsod sa Carmen sa amihanang Sugbo ug Naga sa habagatan.

Kon dunay mga pagpangidnap dinhi sa Sugbo kaniadto, dili magdugay matultolan sa mga Metrodiscom Intelligence ang gitagoan sa mga kidnappers. Mao kadto ang rason nga ang mga nagkidnap sa apo sa ilado kaayo nga negosyanteng Insik dinhi sa Sugbo nangligdas ug naluwas ang bata.

Ilado kaayo nga tulisan ug kriminal nga misundog sa kinaiya ni Robinhood, natiklo diha sa dalan San Jose human madakpi sa mga sakop ni Lacson. Sa wala pa siya mamatay, nagkasultihanay pa kami ug ang tulisan.

Diha nga nahimong presidente si Erap, gihulma sa presidente ang tulo ka task force. Ang Task Force Habagat nga gipangulohan ni Lacson maoy labing sikat ug daghan og dinagko nga kalampusan.

Diha nga nakabisita ko sa PAOCTF headquarters sulod sa Camp Crame kaniadtong tuig 2000, didto gyud nako nakita ang nasakmit nila nga sinakong shabu nga wala mahimo sa uban nga mga operating units.

Nadaot lang si Lacson tungod niadtong pagpatay ni Salvador Dacer ug bata-bata nga si Corbito kay gipasanginlan man nga siya ang utok sa mao nga pagpamatay. Dili lang nako kadto hisgotan.

Basta, kon si Lacson maoy tugyanan pagsumpo sa mga dagko nga sindikato, sigurado ko nga mapuhag silang tanan. Kon ako pa ang president, mao kana ang akong himuon.

Bisan og edaran na si Lacson, apan anaa gihapon kaniya ang katakos sa pagpangulo og grupo nga maka-alkontra sa mga badlongon sa katilingban. Sama ni Mayor Rodrigo Duterte sa Davao, may mibarog ba gud nga nagnegosyo og illegal nga drugas didto?

Ang akong igsuon tua sa Davao ug bisan gani kuno ang pagpabuto og rebentador atol nga magsingabot ang Pasko walay mohimo kay tininuod ang ilang kampanya. Kita dinhi sa Sugbo, naghimo ba gud ta ana?

Usik-usik lang ta sa panahon paghimo sa balaod apan kon adunay madakpan nga tawo sa politiko, dunay mga opisyal nga modupa-dupa unya dili na silotan. Dili ba gud tinuod?

Ang kuwang sa atong nasud mao ang tawo nga matinud-anon ug dili mahadlok mohimo'g aksyon batok sa mga gukdunon sa balaod.

* * *

Naghisgot na man gyud ta og law enforcement, ako na lang pahimudsan. Daygon nako si Loy Madrigal, pangulo sa lain-laing law enforcement team sa Kapitolyo tungod sa makugihon niya nga kampanya batok sa illegal nga pagpangisda, pagsakmit sa mga isda nga kuha sa illegal ug daghan pa.

Gilupig ni Madrigal ang iyang kaatbang dinhi sa dakbayan sa Sugbo nga si Ranulfo Sebusa bisan ug si Madrigal dili gani polis. Si Sebusa retirado nga koronel sa kapolisan apan menos-menos ra og kalampusan. Fight Colonel Sebusa kay mauwaw ta nga ang atong kaatbang sa probinsya daghan ug kalampusan unya kita wala.

Usbon nako, saludo ko nimo Loy Madrigal ug padayon sa imong kakugi. Silingan ra kami ni Loy apan wala lang ko magpaila kaniya. Ayaw lang taptapi ang plate number sa isyu nimo nga sakyanan sa Kapitolyo kay dili kana maayo. He! He! He!