Maleksyon unta

Dili nako tuyoon nga kulbaan g'yud ko sa mata'g higayon nga akong makita ang baga kaayo nga dag-om sa kawanangan ug nagpasabot nga adunay umaabot nga pagbunok sa kusog nga ulan.

Unsaon, hangtod karon wala gayud makasulbad ang mga opisyal sa dakbayan sa Sugbo sa kanunay nga pagbaha. Mora ko'g plaka nga buak nga nagbalik-balik niini'ng mao nga isyu.

Kini lagi nga problema sa pag-awas sa tubig-baha sa Parian Creek malikayan g'yud unta kun kadto'ng kontraktor nga gikuha sa City Hall aron palawman ang sapa, mipalawom sa tanan g'yud nga bahin sa sapa.

Akong balikon nga ang gipalawman lagi nila mao ra ang bahin sa sapa nga makita diha sa karsada ug wala na kini himoa didto sa unahan nga dili na makita sa mga tawo nga moagi sa karsada.

Gibalik-balik na g'yud nako, kaniadto pa, nga bisan og mag-unsa pa og lunop dinhi sa downtown area apan dili mosaka ang tubig didto sa sapa nga nahimutang duol sa pantalan nga gawasanan na unta sa tubig.

Ngano man kini? Ang tubig, wala nila unaha ang pagpalawom didto sa mao nga bahin sa sapa. Kun imong hinuktokan pag-ayo, susama ra nga naghimo ang kontraktor og lungag diha sa ilawom sa mga tulay.

Ang maayo nga himuon ni Mayor Michael Rama mao ang pagpa-imbestigar kabahin niini'ng mao nga isyu kay ang proyekto gihimo ubos sa iyang administrasyon.

Duna ko'y nahinabi nga mga tawo nga namuyo daplin diri sa Parian Creek ug ilang gitug-an nako nga wala gayud mohimo og pagpalawom ang kontraktor didto sa unahan nga bahin sa sapa.

Sa laktod, ingon sa nag-usik-usik lang kita sa kuwarta sa dakbayan nga gibayad sa kontraktor kay wala man ayoha sa pagsuperbisar sa mga engineers nga gitahasan sa mao nga gimbuhaton.

Karon, nakadungog ko nga dunay konsehal nga misugyot na usab nga pagahinan og laing minilyon ka pesos ang pagpalawom sa sapa. Walay problema kun kauyonan nga gahinan og kuwarta ang mao nga proyekto, apan kinahanglan nga ayuhon sa pag-superbisar sa City Hall ang pagtrabaho.

Kanindot unta kun ang opisina sa Department of Engineering and Public Works dia pa tupad sa opisina namo sa The Freeman, kay makasabot g'yud unta ang mga engineers unsay among bation kun modag-om na pag-ayo ang kawanangan.

* * *

Nakatilaw og leksyon ang PUJ driver nga si Stephen Doria kinsa nag-trip cutting kon wala molahos sa iyang rota ug gipakanaog ra ang iyang pasahero aron makabalik dayon siya og makapamik-ap og laing pasahero.

Drayber si Doria sa PUJ nga magbiyahean og Basak-Colon. Kaniadto'ng Miyerkoles, alas 7:40 sa gabii, gipakanaog ra niya ang pipila niya ka pasahero didto sa eskena Sanciangko ug Junquera.

Tumong niya nga makaliko ra siya sa Sanciangko ug makapasakay na usab og daghang pasahero kay daghang pasahero nga nagpaabot sa dalan Colon paingon sa Basak.

Ang iyang rota mosubay unta sa P. del Rosario, Junquera, ngadto sa Colon, liko sa Mabini ngadto na sa Cathedral. Tungod sa iyang pag-trip cutting, usa niya ka pasahero nga babaye naghilak nga mitug-an kanako ug mao nga akong gidala ang isyu sa Land Transportation Office.

Si Aden Belza, administrative chief sa LTO-7 regional office, maoy mihimo sa hearing ug nahibaw-an nga si Doria nakalapas gayud sa lagda "failure to convey" nga ubos sa bag-ong lagda, P5,000 ang multa.

Gisakmit ang lisensya ni Doria ug iuli lang kini kaniya kun mabayran niya ang gilatid nga multa. Maayo unta kun kini nga isyu makatudlo na kaniya og leksyon ingon man sa uban pa nga mga drayber.

Awhagon usab nako ang uban nga pasahero nga gihimoan og susama nga tinonto sa mga abusado nga drayber nga ayaw kahadlok, ireklamo ang pagbinuang kaninyo.

Kamo'ng mga PUJ driver, tumana ninyo ang inyong katungdanan aron dili kamo makatilaw sa dagko nga multahan. Malooy g'yud unta kita nga mopahamtang og multa, apan si Doria makadaghan na madakpi og namultahan base sa rekord sa LTO.

Maayo unta kun ang pagpamulta kaniya makatudlo og leksyon nga dili na moabuso. Ang pagdala-dala ninyo og bata aron kamo kaloy-on, karaan na kana nga kansyon sa mga madakpan nga drayber.