Way abang si Obama

Nahunong ang trabaho sa daghan uyamot nga mga buhatan sa gobyerno ug pribadong mga kompaniya sud sa pila ka gutlo gahapon sa hapon. Di tungod sa sadya nga game show o kulba-hinam nga teleserye. Kon dili tungod sa pag-abot ni Presidente Barack Obama sa Estados Unidos sa nasud ug sa iyang pakigtagbo ni Presidente Noynoy Aquino sa Malakanyang.

Kon may nagduda pa sa katinuod sa surveys nga mas daghang Pilipinhon kay sa Amerikanhon ang ganahan sa Estados Unidos, nakumbinser na tingali pagkakita sa kasadya sa mga nagpainit sa tugkaran sa Malakanyang ug sa mas daghan nga nagtutok sa telebisyon paghangop sa delegasyon ni Obama.

* * *

Apan atu-ato ra ni, kay tingali og masuko ang pito sa matag napu ka Pilipino nga mohangop sa pagpalambo sa presensiya sa Amerikanhong mga sundawo dinhi sa ato, ang pait nga kamatuoran mao nga di gugma sa Pilipinas ug mga Pilipinhon ang nagtukmod ni Obama pagduaw sa Pilipinas.

Gihapit ta niya dayong human sa iyang pagduaw sa Asya tungod sa kamahinungdanon sa Pilipinas sa determinado nga pagpalig-on sa ilang presensiya dinhi sa Asya ug Pasipiko. Atubangan sa nagkadako nga hulga gikan sa higpit niyang karibal nga China. Di lang sa natad sa ekonomiya kon dili ug labi na sa natad sa militar.

* * *

Nakuha nang Obama ang labing mahinungdanon niyang tahas sa Pilipinas human napirmahan pila ka takna sa wa pa siya moabot ang Enhanced Defense Cooperation Agreement:

•           Nga samtang wa motugot sa pagtukod og mga baseng militar dinhi sa ato, niuyon sa pagpanday og mga istruktura nga maggamit sa mas daghang Amerikanhong mga sundawo ug ilang kahimanan nga segurong maglakip sa mga barko ug mga ayroplano sa gubat; ug

•           Gobyerno sa Pilipinas maoy magbuot asa tukora ang mga istruktura ug makaapil sa paggamit ang atong mga sundawo labi na atol sa dagkong katalagman busa, ug palihug panggunit sa imong lingkoranan aron di matagak, di mobayad ang Estados Unidos og bisan usa ka dako nga abang sa Pilipinas.

* * *

Laing pait nga kamatuoran mao nga mapirmahan gihapong EDCA bisan wa pa moduaw si Obama. Apan gipili niya ang paggahin og duha ka adlaw dinhi. Bisan di modeklarar nga panalipdan ang Pilipinas batok sa China, iyang presensiya maoy gamhanang pasidaan sa mga nasud nga manghasi nato.

Dakong baligho ang pag-uyon ni Presidente Aquino sa EDCA. Kay napalayas man ang US military bases sa Pilipinas atol sa pamunoan sa iyang inahan, si Cory Aquino. Apan atubangan sa hudlat sa China, kinsa may lain niyang kadangpan? Manghinaot na lang ta nga naleksiyon siya sa kasaysayan ug makaangkon og kaisog sa pag-insistir og mas makiangayong relasyon uban sa mas gamhanang mga nasud.

* * *

Email: [email protected]