Kaligdong ni Inday Tikay

Nakasinati siya sa kalaksot sa piniliay niadtong Mayo 2013. Kanus-a hapit tanang nanagan namintaha--nangampanya bisan wa pa magsugod ang campaign period, namutang og campaign materials nga mas dako kay sa gitugot bisan sa mga dapit nga gidili, pagbukubukohay sa mga sakop sa samang partido ug pagbaha sa kuwartang gipamalit og mga boto.

Apan wa siya magmahay nga nidagan sa piniliay. Daghan siyang nakat-onan nga di unta mahibaw-an kon igo lang naniid ug nagpaantaw sa daplin. Wa niya tak-opi ang kahigayonan nga mohupot og katungdanan sa gobyerno. Apan nitatawng daan nga di itahan ang batakan niyang mga mithi ug mga prinsipyo.

***

Pagpatigbabaw sa iyang mga mithi ug mga prinsipyo maoy usa sa gibasol sa mga dumadapig ni Tisha "Inday Tikay" Ylaya nga nakapilde niya pagka konsehal sa habagatang distrito sa Dakbayan sa Sugbo ubos sa Team Rama. Hugtanon nga nagdumili pag-apil sa hugaw nga duwa sa iyang mga kaatbang ug bisan sa iyang kaubanan.

Pila ka adlaw human napasakang iyang certificate of candidacy, giduaw si Tikay sa usa sa mga tagduma sa ilang kampanya. Nga nakugang pagkakita sa campaign materials nga naglut-od pa sa iyang bay. Nipasabot si Tikay nga wa pay campaign period. Gikantalita siya sa tagduma apan nisumbalik nga di siya mag-usab tungod lang sa politika.

***

Labing kumon nga tambag nga nadawat ni Tikay gikan sa mga nag-una niya sa duyan: "Daog una. Unya na barugi ang imong prinsipyo kon makalingkod na ka sa katungdanan." Wa maglutaw si Tikay. Nagtugkad ang iyang mga tiil sa yuta. Nahibawo nga kinahanglan siyang mosakripisyo sa pipila sa iyang mga mithi aron molampos sa politika.

Apan may sukaranan ang iyang panagana. Kon itahan ang labing batakan niyang mga prinsipyo aron lang makadaog, unsaon man pagkuha pagbalik ang iyang kaligdong inig lingkod na sa katungdanan? Kon magpadailos sa tentasyon sa gahom, asa man siya kutob? Kon mahinayak na paglunang sa lapok, makahaw-as pa ba sa iyang kaugalingon?

***

Nakugang ko sa pagduaw ni Tikay sa among sibyaanan. Nagda siya og mga hinabang alang sa mga biktima sa sunog sa Lorega-San Miguel. Nibalik na sa iyang panginabuhi isip examiner sa IELTS (International English Language Testing System) sa nagkalainlaing bahin sa Pilipinas.

Nahibaw-an ni Tikay nga di na siya itudlo ni Mayor Mike Rama og katungdanan sa City Hall human sa usa ka tuig nga ban karong Mayo. Tungod sa iyang pagbarug nga non-partisan ang niaging piniliay sa barangay ug sa katungod sa kaswal nga mga kawani sa gobyerno gikan sa panggukod sa mga politiko. Lahi namo nga kutob ra sa sulti, si Tikay maisugong nisalmot sa proseso pagtanyag sa iyang kaugalingon alang sa kausaban. Bisan napakyas, padayong nagtuo nga may luna pang kaligdong sa gobyerno.

***

Email: [email protected]