Imbestigaha g’yud pag-ayo

Angay’ng palawman g’yud ang imbestigasyon kabahin sa pagkasakmit sa P10 milyones nga kantidad sa imported nga asukar gikan sa Thailand kay may nagduda nga adunay mga dagkong opisyal sa Bureau of Customs nga nagproteher niini.

Daghan ang nahibulong kon ngano nga sa Warrant of Seizure and Detention (WSD) nga giisyu ni Customs District Collector Ronnie Silvestre alang sa maong mga kargamento wala man niya giklaro nga gi-misdeclare ang kargamento.

Basi sa dukomento dunay lima ka 20-footer container vans nga miabot diha sa Cebu International Port (CIP) luwan sa M/V Titan nga gikan sa Thailand kaniadtong Nobyembre 22. Alang kuno kini sa duha ka locators diha sa Mactan Economic Zone sa Lapu-Lapu City.

Gideklarar sa Import Entry nga ang kargamento mga plastic nga para sa paghimo og eyeglasses ug mahalong matang sa bato sama sa marble ug granite products. Lima sa 10 ka container vans napagawas na sa CIP.

Dihang gisusi ug gigamitan og “X-ray” ang nahabiling lima ka container vans, nasuta nga lahi ang sulod niini sukwahi sa gideklarar nga mga plastic ra kini og mga mahalong kalidad sa bato.

Tungod sa report sa X-ray Inspection Project, giisyuhan ni Collector Silvestre og Alert Orders ug gimando nga sakmiton kadtong lima ka container vans nga napagawas na sa CIP.

Gipangita nila ang mga vans og didto masakpi sa usa ka bodega sa Casuntingan, Mandaue. Duha ra sa lima ka vans ang nasakmit dayon pagbalik kay ang report nga mibabag ang usa ka laing opisyal sa Customs nga sakmiton ang tulo.

Ako pa nga gipasusi kon tinuod ba nga si Customs police chief Camilo Cascolan maoy mibabag nga masakmit pagbalik ang tulo sa lima ka vans nga didto masakpi sa bodega sa Casuntingan.

Samtang nagbasa ko sa gipadala kanako nga mga dukomento, nakapanglingo-lingo ko kay giingon nga dakong negosyante dinhi sa Sugbo ang nalambigit sa maong tinguha pagpayuhot og mga imported nga asukar.

Ang amahan ra ba kuno niining maong negosyante nga gidudahan nga maoy nagpayuhot unta sa P10 milyones nga kantidad sa asukar, suod sa dakong opisyal sa Customs police nga nagbasi sa Manila.

Dia dinhi gikuwestyon si Collector Silvestre kon ngano nga wala siya moinsister nga kadtong tulo ka container van nga wala ipaapil pagsakmit gikan sa usa ka bodega didto sa Casuntingan, Mandaue, madala g’yud unta balik diha sa CIP.

Akong gitimbang-timbang pag-ayo, si Collector Silvestre maoy labing hawod sa mga opisyal sa Customs dinhi sa Sugbo.

Kon tinuod man nga ang Customs police chief maoy mibabag nga masakmit pagbalik ang tulo ka van, mahimo man nga moinsistir si Silvestre nga dad-on g’yud sa CIP ang mga vans kay labaw gud siya’g ranggo kay kang Cascolan.

Mao kana nga miingon ko nga angay’ng ipatin-aw kini pag-ayo ni Collector Silvestre ang maong isyu. Ang laing isyu mao nga ang gipasanginlan nga negosyante nga nagpayuhot unta sa maong mga asukar kanunay nga kaduwa niya og golf.

Buyno, sa ako na nga giingon, ang pagkasakmit sa maong mga imported nga asukar, angay nga himoan og lawom nga imbestigasyon.

Apan wala nako ipasabot nga si Cascolan ug Silvestre nalambigit g’yud niining maong pagtinguha pagpayuhot sa maong kargamento apan dunay mga punto nga angay nila nga ipasabot pag-ayo.