Alegre ang politika

Dugay pa ang pag-antos sa mga piniriso sa Bagong Buhay Rehabilitation Center nga makalingkawas na sila sa huot kaayong prisohan ug makabalhin sila ngadto sa bag-ong bilanggoan nga anaa gihimo sa barangay Kalunasan.

Ang P19 milyones nga kantidad sa prisohan nga gitukod diha sa Kalunasan ug gigastohan sa nasudnong kagamhanan, hapit na mahuman apan dili pa gihapon kini magamit bisan pa og mahuman na, kay walay tubig.

Tan-aw nako mapakyas ang tinguha ni Presidente Arroyo nga ang kapin sa 2,500 ka piniriso sa BBRC mabalhin na sa bag-ong bilanggoan sa dili pa mapahigayon ang Asean Summit karong Disyembre.

Nakapanglingo-lingo ang grupo nila ni Bise Mayor Michael Rama nga mituyo sa pag-inspection kagahapon sa nagpadayong pagtukod og bag-ong bilanggoan sa barangay Kalunasan.

Kon ang maong bilanggoan direkta nga mokuha og tubig gikan sa linya sa Metro Cebu Water District, gibana-bana nga ang BBRC og P650,000 matag buwan sa bayranan sa tubig alang sa 2,500 ka piniriso.

Gipasabot ni BBRC warden Efren Nemeño nga mahal ang baligya sa MCWD sa tubig kon anha na sa Kalunasan kay mapugos man sila pag-instalar og higanteng water pump aron madala sa ibabaw ang tubig.

Dunay usa ka water pump nga gikuhaan og tinubdan sa tubig sa mga lumulopyo sa Kalunasan, apan kon ang BBRC anha mokuha og tubig niini, mahubsan ug wala nay magamit ang mga lumulopyo sa maong dapit.

Ang labing maayo nga buhaton mao na lang g'yod nga ang BBRC magmugna og kaugalingon nila nga water pump.

Hinoon, daku-daku sab g'yod og gasto kay gibana-bana nga moabot og P10 milyones ang gastohon sa pagmugna og water pump nga makasuplay og tubig alang sa 2,500 ka piniriso.

Ang set-up mao kini. Kay ang bilanggoan anaa man gitukod ibabaw sa bungtod, ang tubig adto kuhaon sa tinubdan sa ubos nga bahin. Sa ato pa, ang tubig gikan sa ubos, ibuga kini ngadto sa bilanggoan sa ibabaw sa bungtod pinaagi sa water pump.

Apan kinahanglang mogasto pa ang BBRC og kapin sa P100,000 para sa paghimo og pagtoon kon asa dapit ibutang ang tubo sa tubig aron nga ang tubig nga ilang makuha dili dayon mahurot.

Sa ato pa, tun-an g'yod og maayo nga ang maigo sa tubo nga mosuyop sa tubig ilawom sa yuta mao ang dakung tinubdan.

Ingon niini ang sitwasyon, kadtong mga tawo nga makasala o katahapan nga nakahimo og sala, ibutang sa prisohan aron gastohan sa kagamhanan gikan sa pagkaon ug pag-alima sa ilang mga panginahanglan.

Daghan ang wala masayod nga usa sa nakapaut-ot sa atong salapi sa nasud mao ang pagmentinar sa mga binilanggo. Milyon-milyon ka pesos ang gasto sa kagamhanan sa pagpakaon sa mga piniriso.

* * *

Misamot ang akong pagsaway sa lider sa usa ka militanteng grupo dinhi sa Sugbo tungod sa iresponsable niini nga pamahayag kagahapon nga gipaagi niya sa text message kabahin sa usa ka "boto" nga nakapaguba sa usa ka building sa Mandaue.

Sayonan ka, nagpadala ang maong tawo og text message ngadto sa announcer sa DYLA ug kunohay misaway sa maong panghitabo nga iyang giingon nga binuhatan sa mga terorista.

Maayo gani kay abtik ang mga announcer nga nakadawat sa iyang text massage nga miklaro nga wala pay "official findings" nga nagdeklarar nga terorista ang hinungdan sa maong pag-ulbo.

Tuod man, nahibaw-an nga ang tangke ra sa liquefied petroleum gas ang nakaingon sa pag-ulbo sa usa ka Laundry Shop sa barangay Basak. Ang gibuhat sa maong tawo, daw sa iyang pakurogon ang katawhan sa iresponsable niyang pamahayag.

Ang kapolisan ingon man si Mayor Thadeo Ouano, mitataw g'yod nga dili mga terorista ang nakapaulbo sa maong building. Kon ako pa hinoo'y nakadawat sa iyang mensahe, diritso nako kini nga I-delete sa akong cellphone kay daan na kong walay salig sa maong nagpaila nga lider sa militanteng grupo.

Ayaw pagpataka og tabi Bay kon wala kay basihanan sa imong pamahayag.

* * *

Tinuod ang pamahayag ni Mayor Tomas Osmeña. Moalegre ang eleksyon dinhi sa dakbayan karong sunod tuig kon matinuod ang mga tabi-tabi nga si kanhi Kongresista Jose "Dodong" Gullas molansar pagka mayor.

Apan sa pagka karon, dili lang usa nato hisgutan pag-ayo kining maong isyu. Tukma si Tommy, mas makaayo sa katawhan kon dunay daghan nga mapilian nga kandidato.