Impeachment

Nakabantay ko nga kadaghanan sa mga abogado nga defense counsels ni Vice President Sara Duterte sa giatubang niya nga Impeachment Case sa Senado, mga batan-on.

Hinuon, wa ko magpasabot nga abi kay medyo edaran na ang mga public ug private prosecutors nga sila mga mas utokan kay sa mga abogado sa depensa.

Mahibaw-an kini nato ugma kay mopresentar na man og prosecution witness ang Panel of Prosecutors gikan sa Kongreso nga gipangulohan ni Kongresista Gerville Luistro.

Ang lead counsel hinoon ni Duterte maingon nato nga hait sab og kinaadman. Panid-an nato ugma sa ikaduhang adlaw sa trial nga magsugod na pagpresentar og mga witness.

Sa laing bahin, nahimong ordinaryo nga senador si Senate President Win Gatchalian kay nagpakahilom lang gyud siya, ug si Senador Chiz Escudero mao ray nagtingog nga maoy nag-preside sa Impeachment Trial.

* * *

Sa laing bahin, pipila ka oras sa wa pa magsugod ang Impeachment Trial sa mga kaso batok ni Vice President Sara Duterte, ang usa sa mga senador nga bokal kaayong milaban kaniya gidakop tungod sa warrant of arrest gikan sa Sandiganbayan.

Human si Senador Rodante Marcoleta miadto sa Sandiganbayan aron sa pag-surrender, gidakop dayon siya sa mga sakop sa PNP Criminal Investigation and Detection Group (CIDG) ug gidala sa Sandiganbayan Division nga nag-isyu sa warrant of arrest.

Miduso unta ang mga abogado ni Marcoleta og Motion to suspend proceedings and defer the issuance of warrants of arrest batok sa senador, apan gibalibaran kini sa Sandiganbayan.

Ang Anti-Graft Court nakatan-aw nga dunay basehanan ang kaso nga giduso sa Office of the Ombudsman batok kang Marcoleta ug angay kini nga kahimoan og husay mao nga miisyu kini og warrant of arrest.

Ang korte dili makasugod paghusay sa usa ka kaso kon ang akusado dili madakpan ug mapaatubang sa mga hurado.

Kining kaso nga giatubang ni Marcoleta kabahin sa wa niya pagbutyag sa iyang Statements of Contribution and Expenses (SOCE) nga atol sa paglansar niya pagka senador nakadawat siya’g P75 milyones nga campaign funds.

Gani ang tulo ka tawo nga mihatag sa maong campaign funds kang Marcoleta apil sab nga giisyuhan og warrant of arrest nga way piyansa. Sila mao si kanhi Kongresista Mike Defensor, businessman Aristotle Viray ug Joseph Espiritu.

Ang pagkapriso ni Marcoleta gikabalak-an nga makaapekto sa kaso batok ni Duterte.

Matud ni Marcoleta nga andam siyang moatubang niining kaso nga gipasaka sa Ombudsman batok kaniya, ug dili siya motago kon kahatagan man og temporaryo nga kagawasan.

Ang epekto niining pagdakop kang Marcoleta kay dili na siya makatambong sa Impeachment Trial ug maibanan ang mga senador nga mga dumadapig kang vice president Sara Duterte.