‘Naimpluwensya’ sa gorebox

CEBU, Philippines — Planado ang pagpamusil sulod sa San Jose National High School sa Tacloban City niadtong Hunyo 22, nga miresulta sa kamatayon sa tulo ka estudyante ug pagkaangol sa 20 ka lain pa.

Apan pakyas ang mga suspek nga nag-edad og 14 ug 15 anyos nga makita ang ilang target nga indibidwal ug maoy gipahimungtan ang bisan kinsa nalang nilang makita sa sulod sa eskwelahan nianang higayona.

Sumala pa ni Region 8 Police Director BGen. Jason Capoy, base sa imbestigasyon, giplano ng daan sa duha nga buhaton ang maong krimen wala pay Mayo 1.

Naa daw silay target nga indibidwal  sa eskuylahan. Apan sa dihang wala nila kini makit-I bisan kinsa nalang ang ilang gipamusil.

Sa datos sa kapolisan tulo ang namatay duha ka babaye ug usa ka lalaki. Sa 20 ka naangol, 15 ang naigo sa bala nga naglangkob og unom ka babaye ug siyam ka lalaki. Samtang laing lima nga naangol resulta ni sa ilang pagdinaganay tungod sa kahadlok. Ang tanang biktima padayong giatiman sa tambalanan.

Online Game

Gikumpirmar usab sa kapolisan nga usa sa suspek naimpluwensyahan sa online game nga “GoreBox,” usa ni ka violent simulation game ug usa sa gitutukan karon sa imbestigasyon  nga posibleng factor sa nahitabo.

Tungod niini, temporaryong gipa-block sa Cybercrime Investigation and Coordinating Center ang online game nga GoreBox .

Ang CICC nipagawas og pamahayag kagahapon, June 23 , nga ilaha ning gibuhat human nigawas sa inisyal nga imbestigasyon sa kapolisan nga ang usa sa mga suspek usa ka avid player sa maong duwa.

Matud pa sa CICC ang GoreBox nga unang gilusad adtong 2023, usa ka "physics-driven sandbox game where creativity meets unrestrained destruction,"  diha sa duwa, kinahanglang mag-eksperimento ang player sa paggamit og klase-klaseng mga armas ug duna say mga graphic depictions sa bayolenteng mga buhat.

"We are blocking GoreBox temporarily as a precautionary measure pending the investigation. Within the day, expect the app to be blocked," matud pang CICC Undersecretary Aboy Paraiso.

"We cannot ignore possible online influences that may have contributed to this tragic incident. Temporarily blocking the game will allow authorities to conduct a thorough assessment and determine whether the platform played any role in the actions of the suspects," dugang pa niya.

Policewoman

Gipadayag sab sa Philippine National Police nga ang.38 revolver nga narekober gikan sa mga suspek narehistro sa usa ka Cebu City-based security agency, samtang ang 9mm Glock pistol gi-isyu sa usa ka pulis nga naka-assign sa PRO-8 nga iyaan sa usa sa mga suspek.

Ang maong policewoman nga tag-iya sa Glock 19, bag-ohay pang nipasar sa Bar Examination niadtong 2023 samtang nag-ranggo pa og Police Staff Sergeant.

Nag-atubang siya karong og administrative investigation ug summary dismissal procedure.

Naay nanggawas nga mga post sa social media nga giingong ‘combo messages’ sa duha diin ilang gihisgotan ang kabahin sa kung asa sila mokuha og armas ug sa ilang buhaton sa eskuylahan, asa sila magkita, unsang orasa nila ni buhaton hasta pud ang mahitabo nila human sila makapatay. Ila sab gihisgutan nga dili ra sila mapriso kay mga menor de edad pa sila ug kun mapriso man, makagawas ra sila sa edad nga 21 anyos.

Ang Cebu City Police Office (CCPO) andam motabang sa imbestigasyon bahin sa security agency dinhi nga nanag-iya sa .38 caliber revolver nga gigamit sa usa mga suspek.

DepEd

Samtang, nagpatuman og mas hugot nga seguridad sa mga eskwelahan ang Department of Education (DepEd-6), lakip ang police visibility, CCTV enhancement, no-contact bag checks, ug anti-bullying campaigns aron malikayan ang susamang insidente.

Tunga-tunga sa trahedya, usa sa mga namatay nga si Chriz Lorenz Fabian, 15 anyos, ang giisip nga bayani sa ilang eskuylahan kay siya maoy nisira ug nibabag sa ilang pultahan para maprotektahan ang iyang classmates ug dili makasulod ang mga suspek. – IBM BANAT NEWS