Padung magpa-checkup nabanggaan
CEBU, Philippines — Lalaki nga padulong sa medical checkup, patay human mabanggaan ug maligsan sa dump truck didto sa Mambaling sa dakbayan sa Sugbu niadtong kagahapon, Hulyo 14.
Ang namatay mao ang 56-anyos nga si Joel Daffon Barcenas nga sakay og e-bike anang tungora sa aksidente diha sa C. Padilla Street sa Barangay Mambaling, Cebu City, alas-9:15 sa buntag.
Ang biktima residente sa Sitio Alumnus, Barangay Mambaling ug nigawas sa imbestigasyon sa Traffic Enforcement Unit (TEU) sa Cebu City Police Office, padulong unta siya sa Dr. Lawas Clinic sa Barangay Duljo Fatima alang sa iyang medical checkup sa dihang nahitabo ang insidente.
Base sa CCTV footage, ang dump truck nga gimaneho ni Gilbert Quijano Ardiente, 42, padulong sa F. Vestil Street samtang ang e-bike sa biktima naggikan sa laing direksyon.
Kalit nga niliko padulong sa wala ang e-bike apan nawad-an og kontrol ang drayber niini maong natumba sa karsada hinungdan nga nabanggaan siya og naligsan sa likod nga walang ligid sa dump truck.
Grabeng samad sa ulo ang naangkon sa biktima. Gidala siya sa Cebu City Medical Center apan gideklarang dead on arrival sa mga doktor.
Samtang nagpadayon ang imbestigasyon, ang drayber sa dump truck anaa sa kustodiya sa TEU.
Giandam usab sa kapulisan ang posibleng kasong Reckless Imprudence Resulting in Homicide. IBM BANAT NEWS
- Latest
