Kagaw ug konsabo

Tan-awa ra gud kining binuang sa mga doktor sa Philippine National Police General Hospital (PNP-GH). Dihang nadakpan si Senador Rodante Marcoleta niadtong Hulyo 6, niinsistir sila nga taas kaayo ang iyang blood pressure ug dili pa siya angay nga prisuhon.

Human sa pila ka adlaw, dihang sibaw nang awhag sa publiko nga prisuhon na si Marcoleta sama sa iyang kaubang sinumbong nga si kanhi kongresista Mike Defensor, niingon na sab sila nga dili luwas ang pagbiyahe ni Marcoleta gawas sa ospital kay duna diay siyay mild pneumonia.

Wala silay klarong tubag dihang gipangutana sa mga mahistrado sa Sandiganbayan niadtong Biyernes nga kon dunay pneumonia si Marcoleta, nga sa ato pa mananakod siya, nganong gitugotan man silang Bise Presidente Sara Duterte ug Senador Robin Padilla nga niduaw niya nga wala magsul-ob og face mask?

Maong nakahukom ang mga mahistrado sa pagpangita og second opinion. Aron pagpapas sa mga pagduda nga kakonsabo ni Marcoleta ang mga doktor, kon dili man ang kadagkoan g’yud sa kapolisan, sa pagpaburot sa kagrabe sa iyang mga sakit aron lang makalikay sa prisohan.

Gihatagan sa Sandiganbayan ang mga espesyalista sa Philippine General Hospital (PGH) og tulo ka adlaw sa pagsusi sa tinuod nga kahimtang sa panglawas ni Marcoleta. Ang PGH, nga ubos sa pagdumala sa University of the Philippines ug busa gituohan nga mas kasaligan, gipaabot nga maka-report na sa ilang findings karong adlawa, Martes.

Tungod sa kahigayonan nga mabisto ang ilang binuang, nga kuwang na lang og diyutay nga tungluhon nga himatyon si Marcoleta, wala na magkadimao ang sinultihan sa taga PNP-GH.

Niingon na sab sila nga dili na diay mananakod si Marcoleta busa mahimo nang paatubangon sa Sandiganbayan aron kasilbihan sa iyang commitment order para sa male dormitory sa bag-ong Quezon City Jail sa Payatas nga mao say nahimutangan nilang Senador Jinggoy Estrada, kanhi senador Bong Revilla, ug Defensor.

Niangkon sab nga sa PNP-GH na natakdan og kagaw si Marcoleta maong nag-pneumonia. Wala diay seguro nga mas luwas si Marcoleta kon ibalhin sa labing daling panahon sa mas bag-ong prisohan kay sa magpabilin sa ospital nga gilubloban og mas daghan ug mas bangis nga mga kagaw.