Nangubkob og balas, gidakop

CEBU, Philippines — Nasikop sa kapolisan ang usa ka 36-anyos nga lalaki human masakpan nga giingong nanguha og bas nga walay permit sa daplin sa suba sa Barangay Santa Lucia, Asturias, alas 2:30 sa hapon niadtong Miyerkules, Hulyo 8.

Ang suspek giila nga si Bernie Simbajon Perez, 36, residente sa Purok 7, Barangay Santa Lucia, Asturias.

Gipahigayon sa kapolisan ang operasyon human makadawat og sumbong gikan sa usa ka concerned citizen bahin sa giingong iligal nga pagpanguha og balas sa maong lugar.

Sa pag-abot sa mga otoridad, nasakpan si Perez nga nagkubkob og balas gamit ang pala ug gisulod kini sa 20 ka sako.

Sa dihang gipangayoan siya sa permit sa pagpanguha og balas, wala siya makapakita sa gikinahanglang dokumento, maong gidakop siya sa kapolisan. Ang nakuhang balas ibaligya og P40 matag sako.

Matud ni PCapt. Jessie Tañola, hepe sa Asturias Municipal Police Station, kasagarang mapalit ang maong balas sa mga naghimo og hollow blocks sa lungsod.

Matud pa sa kapolisan, kasagaran kining ilegal nga pagpanguha og balas mahitabo kun walay nagbantay.

Giatubang karon ni Perez ang kasong paglapas sa Section 103 sa Republic Act No. 7942 o Philippine Mining Act of 1995, nga nagdili sa pagpanguha o pagmina og mineral resources nga walay gikinahanglang legal nga awtoridad o permit.—  IBM BANAT NEWS