Mas taas nga korte
Tungod sa kaguliyang sa Senado ug sa kadali nga nakabalitok sa mga senador sa nagkabangga nga mga kampo, mas madudahon nang publiko:
Gidudahan si Chiz Escudero nga kon mahimong presiding officer mosabotahe sa impeachment trial ni Bise Presidente Sara Duterte sama sa pagyaka sa articles of impeachment sa niaging tuig;
Gidudahan si Win Gatchalian kay nisipsip ni VP Sara aron mag-pares unta sila og dagan niadtong 2022; ug
Gidudahan si Joel Villanueva ug ubang mga sakop sa majority bloc nga molikoy tungod sa kahadlok sa mga botante ni VP Sara.
-o0o-
Pero ang presiding officer sa husay, si Chiz man o si bisan kinsay mapilian sa majority bloc dayong sugod sa husay sa Hulyo 6, dili ingon niana kagamhanan. Ang bisan unsang kontrobersiyal nga desisyon mahimong hagiton ni bisan kinsang senator judge. O kon mopakita og dili maayong lihok mahimong pulihan sa boto sa mayoriya.
Gusto sab tang motuo nga ang mga senador nahibawo unsa kamakasaysayanon sa husay nga ilang himuon. Wala tingali tarung og kabuot nga mohimo og mga pakauwaw nga makabuling sa kadungganan sa umaabot niyang kaliwatan.
-o0o-
Bisan ang mga senador nga nidupa nang daan ni VP Sara dili maseguro kon absuwelto ba gyod ang ilang desisyon inigka human na sa husay. Mapugos sila sa pagpaminaw sa mga saksi ug pagtuon sa mga ebidensiya batok ug pabor sa sinumbong.
Kon makabungog ang mga ebidensiya nga momatuod nga dunay binilyon ka pesos nga katigayonan nga gitagoan si VP Sara ug nga iyang gibolsa ang confidential funds imposible nga dili kaabot og 16 ka senador ang mo-konbikto.
-o0o-
Gamhanang puwersa nga mogiya sa mga senador pagtarung sa ilang trabaho mao ang paghinumdom: Bisan sa kahawod sa impeachment court, nga bisan ang Korte Suprema dili makasubli sa ilang desisyon, hukman sila sa mas taas nga korte sa public opinion.
Dili angay nga magtan-aw ug maminaw lang ang katawhan. Angayng magtuon sa mga ebidensiya, mosubay sa husay ug mopabati sa ilang tingog: Isalikway ang bakak ug barugan ang kamatuoran. Labaw sa tanan pahibaw-on silang VP Sara ug ang mga huwes: Mahimo silang mosuway og panglawgaw, pero dili nila mailad ang tanang katawhan sa tanang higayon.
- Latest
