24 Genesis bus, sinuspinde ng LTFRB

MANILA, Philippines — Sinuspinde ng Land Transportation Franchising and Regulatory Board (LTFRB) sa loob ng 30 araw ang operasyon ng 24 na yunit ng North Genesis Bus Line, Inc. matapos masangkot ang isa nitong bus sa aksidente sa Baguio City na ikinasawi ng dalawang pasahero.

Ayon kay LTFRB Chairman Vigor Mendoza II, isinasagawa ang suspensyon upang bigyang-daan ang imbestigasyon at matukoy kung may paglabag ang kumpanya sa mga regulasyon ng ahensiya.

Nangyari ang aksidente noong Hunyo 16 sa Marcos Highway, Baguio City, nang bumangga ang bus sa isang nakaparadang trak. Dalawa ang nasawi habang anim ang nasugatan.

Iniutos din ng LTFRB ang drug testing sa lahat ng driver ng kumpanya at ang roadworthiness inspection ng lahat nitong bus units.

Pinamamadali rin ng ahensiya ang pagproseso ng insurance claims para sa mga biktima at kanilang mga pamilya, habang muling pinaalalahanan ang mga operator at driver na mahigpit na sundin ang mga patakaran sa kaligtasan sa kalsada.