P8 milyong pekeng bags nakumpiska ng NBI

MANILA, Philippines — May kabuuang tinatayang P8-milyon na halaga ng mga pekeng produkto ng bag ang nasamsam sa isinagawang pagsalakay ng mga ahente ng National Bureau of Investigation (NBI) sa ilang tindahan sa Pasay, Maynila at Bataan, sa magkakasunod na operasyon, iniulat nitong Sabado.

Sa ulat ng NBI-Intellectual Property Rights Division kay NBI Director Judge Jaime Santiago, Agosto 20, 28, at 29 nang isagawa ang mga pagsalakay sa mga tindahan gamit ang search warrants sa tatlong lugar.

Nag-ugat ito sa pormal na reklamong idinulog ng kinatawan ng Jansport trademark na mapigilan ang pagkalat sa merkado ng mga pekeng bag, at paglabag sa Section 155 (Trademark Infringement) kaugnay sa Section 170 ng RA  8293.

Nasamsam ang nasa 4,555 piraso ng assorted products na nagtataglay ng Jansport trademark na aabot sa halagang P8,144,950.00.