Binata binistay ng bala

MANILA, Philippines – Utas ang isang binata makaraang pagbabarilin ng armadong lalaki habang ang una ay nakaistambay sa isang eskinita na nag-ugat umano sa onsehan sa iligal na droga sa lungsod Quezon, kamakalawa ng gabi.

Walong tama ng bala sa ulo at katawan ang tumapos sa buhay ng biktimang si Cedric Arnie Soriano, 22, ng Kamagong St., Brgy. Commonwealth.

Ayon kay P03 Jaime de Jesus, nangyari ang insidente sa kanto ng Kamagong St., Barangay Commonwealath ganap na alas-10:45 ng gabi.

Sabi ni Ronnie Dela Cruz, pinsan ng biktima, nakatakda na sana siyang matulog sa loob ng kanilang bahay nang makarinig siya ng mga putok ng baril mula sa labas.

Nang kanyang tignan ay saka niya nakita ang pinsang si Cedric na duguang nakabulagta sa nasabing lugar. Agad siyang humingi ng tulong sa mga kapitbahay na siya namang tumawag ng awtoridad para sa pagsisiyasat.

Onsehan sa iligal na droga ang sinasabing motibo ng nasabing pamamaril dahil maging ang kaanak ng biktima ay aminadong gumagamit ito ng droga at mayroon na ring nakakaaway tungkol dito.

Gayunman, patuloy pa ring iniimbestigahan ang insi-dente.