Kasambahay tusta sa Makati fire

MANILA, Philippines – Utas ang 25-anyos na kasambahay matapos hindi makalabas sa nasunog na bahay sa Barangay South Cembo sa lungsod ng Makati ngayong Lunes.

Kinilala ni Senior Inspector Tito Purgatoryo ng Makati Fire Department ang biktimang si Cristine Zea.

Ayon sa imbestigasyon, hindi nakalabas ng kanyang kuwarto si Zea nang masunog ang tinutuluyang bahay sa panulukan ng kalyeng General Jacinto at General Luna.

Nagmula ang sunog ganap na 3:24 ng umaga dahil sa nag-overheat na wall fan, banggit ni Purgatoryo.

Umabot ang sunog sa ikaapat na alarma bago ito naapula ng mga bumbero ganap na 4:15 ng umaga.

Tinatayang aabot sa P3 milyon ang halaga ng mga natupok na ari-arian.