MANILA, Philippines - Nasukol ng mga barangay tanod ang tatlong hinihinalang holdaper na itinuturong responsable sa serye ng panghoholdap sa Sta. Cruz, Maynila, sa aktong binibiktima at hinihipuan pa ang hinubarang dalaga sa loob ng tricycle, kahapon ng madaling-araw.
Arestado ang mga suspect na sina Jose Flores, 23; Veron Amonelo, 22; at Joel Samson, 30, pawang residente ng Solis St., Tondo.
Sa takot at kahihiyan, hiniling ng biktimang 22-anyos na dalaga na itago ang kanyang pangalan.
Ayon sa ulat, papauwi na ang biktima at habang naglalakad sa naturang lugar ay biglang sumulpot ang isang kulay asul na tricycle (ON-4368) na sinasakyan ng mga suspect. Nilapitan at agad na tinutukan ng patalim ang biktima at inagaw ang kanyang dalang bag na naglalaman ng mga personal na kagamitan, cash at valuables na nagkakahalaga ng P4,705.
Isinakay pa umano siya sa tricycle at doon ay hinubaran at pinaghihipuan ng mga suspect sa maseselang bahagi ng katawan.
Nagkataon na nagpapatrulya ang ilang barangay tanod na nakasulyap sa tricycle na may humihiyaw kaya nilapitan at nagsipulasan ang ibang suspect na nagresulta sa pagkaka-aresto lamang sa tatlo.
May dala pa umanong baril ang nakatakas na mga suspect.