15 APO members kinasuhan sa hazing

MANILA, Philippines - Pormal nang iniakyat sa Makati Regional Trial Court ang kasong paglabag sa Anti-Hazing Law sa 15 miyembro ng Alpha Phi Omega fraternity makaraang desisyunan ng Makati City Prosecutor’s Of­fice na may probable cause o direk­tang kaugnayan ang mga ito sa pagkasawi ng isang estudyante sa isinaga­wang hazing rites.

Sa resolusyon na pinirma­han at inaprubahan ni City Pro­secutor Feliciano Aspi, sapat na ang mga ebiden­syang isinumite ng Makati police para makita ang pro­bable cause sa kaso laban kina John Rey­nald Marin, Roesel Wences­lao, Michael Pagulayan at Rico Man­salapus.

Nasa kustodiya na ng pu­lisya ang apat na akusado habang pinaghahanap pa ang 11 pa na nakilalang sina Haren Ray Tigno, Jorie Ann Acob, Sheldon Derrick So­riano, Raycon Vargas, Ronnel Galas, Mar Anthony Laroza, John Paul Buban, Jeven Soquita, Kim de Roxas, Niko Moreto at Noel Mallari.

Ang mga akusado ang iti­nuturong may mga direktang kaugnayan sa pagkasawi ng 19-anyos na si EJ Carl Intia sa hazing ng naturang fra­ternity noong Agosto 14. Iti­nakda naman ang prelimi­nary investigation sa Setyem­bre 7 at 14 bago ipa-raffle ang kaso kung sinong hukom ang mag­lilitis nito. Wala namang itinak­dang piyansa para sa mga akusado.

Nasa kustodiya naman ng Makati Social Welfare De­ part­ment ang ikalimang sus­pek na sumuko sa pulisya, hindi ito pinangalanan dahil sa pagiging menor-de-edad nito.

Ayon kay Prosecutor Lody Tancioco, positibo na suma­ilalim sa inisasyon ng APO fraternity si Intia base sa per­sonal na notebook at mga leaf­lets na pag-aari nito at isinumite ng ama nitong si Oscar sa pulisya.

Matatandaan na natag­puan ang bangkay ni Intia noong Agosto 15 sa isang ba­ngin sa Sta. Maria, Laguna isang araw matapos ang ini­tia­tion rites. Sa awtopsiya, nag­­tamo ng matitinding bug­bog sa hita ang biktima bunga ng palo ng paddle ngunit nasawi ito dahil sa mga palo sa ulo at sa kanyang kase­lanan.