MANILA, Philippines - Aksidente lamang ang pagkakaaresto sa isa sa dalawang suspect na humablot sa gintong kwintas at nakapatay sa isang seaman noong Hunyo 17 ng umaga, sa Singalong, Malate, Maynila, ayon sa ulat kahapon.
Hawak na ng Manila Police Distric-Homicide Section ang suspect na si Ronald Sevilla, 26, ng Unit 112 Building 4 Safari Bldg. Paco, Maynila, na kinilala ng testigo at tumugma rin sa footage ng closed circuit television ang hitsura.
Nabatid na unang inaresto ng mga tauhan ng MPD-Station 6 ang suspect dahil sa tawag na kaguluhan sa kanyang nasasakupan.
Nakunan ang suspect ng balisong at nang beripikahin ay may mga record itong snatching at serye ng robbery kaya’t hiniling ni MPD-Homicide chief, C/Insp. Erwin Margarejo na isama sa line-up ang suspect kung saan positibong kinilala ng testigo. Ibinase rin ang hitsura, kasuotan nito na katulad ng nasa CCTV at siyang nai-record ng video na bumaril sa biktimang si Edralin Amon, 49, 3rd Engineer, tubong-Davao at pansamantalang nanunuluyan sa # 2128 Singalong st., Malate, Maynila.
“Kung mapapansin ninyo, yung suot niyang shorts ngayon (suspect) nang mahuli siya ay iyon ding shorts na suot niya noong barilin niya ’yung biktima pati na yung pangangatawan niya,” paliwanag ni Margarejo.