MANILA, Philippines - Nasa malubhang kalagayan ang isang inhinyero makaraang saksakin sa sikmura ng kanyang kinakasamang babae sa gitna ng kanilang pagtatalo, kamakalawa ng gabi sa Las Piñas City.
Inoobserbahan ng mga manggagamot sa Las Piñas Doctors Hospital makaraang lumuwa ang bituka ng biktimang si Mark Tan, 30, ng Block 9 Lot 16 Sambayanihan Peoples Village, CAA, ng naturang lungsod. Sumuko naman sa pulisya ang kinakasama nitong si Teresita Bacsal, 27, makaraan ang pananaksak. Nabatid na nagtamo rin ito ng sugat sa kanyang kaliwang kamay.
Sa ulat ng Las Piñas police, nagtatalo ang magka-live-in kamakalawa ng gabi dahil sa umano’y pagseselos ni Bacsal sa isang babae na karelasyon rin ni Tan. Dinig na dinig umano ng kanilang mga kapitbahay ang sigawan ng dalawa hanggang sa marinig na lamang nila na humingi ng saklolo si Tan.
Mabilis na isinugod ng mga kapitbahay si Tan sa pa gamutan kung saan masuwerteng nailigtas ito sa kamatayan. Nabanggit pa nito sa pulisya na wala umano siyang planong sampahan ng kaso ang kina kasama dahil sa napatawad na niya ito sa ginawa at nananatili ang kanyang pagmamahal dito. (Danilo Garcia)