MANILA, Philippines - Patuloy na nagbabanta ang bagyong Jolina sa Hilagang Luzon. Bunsod nito, sinabi ng Philippine Atmospheric Geophy sical and Astronomical Services Administration (PAGASA) na nakataas ang signal number 2 sa lalawigan ng Aurora, Isabela at Cagayan. Habang nakataas naman ang signal number 1 sa mga lalawigan ng Northern Quezon, Nueva Ecija, Bulacan, Tarlac, Zambales, Pampanga, Pangasinan, La Union, Abra, Nueva Vizcaya, Quirino, Ifugao, Benguet, Mountain Province, Kalinga, Apayao, Ilocos Sur, Ilocos Norte at Batanes Group of Island. Ayon sa Pagasa, dakong alas-10 ng umaga kahapon nang mamataan si Jolina sa layong 200 kilometro (km) ng Silangan-Hilagang-Silangan ng Casiguran, Aurora at 240 km ng Silangan-Timog-Silangan ng Tuguegarao, Cagayan. Taglay ni Jolina ang lakas ng hanging 75 km bawat oras (kph) malapit sa gitna at may pagbugso hanggang 90 kph. Ngayong Linggo, si Jolina ay inaasahang nasa 80 km ng Katimugang Kanluran ng Laoag City at 560 km ng Kanluran-Hilagang-Kanluran ng Laoag City sa Lunes ng umaga. Kaugnay nito, sa kabila ng patuloy na pagbabanta ng bagyong Jolina sa Hilagang Luzon, isa na namang Low Pressure Area (LPA) ang namataan sa layong 630 km ng Silangan ng Casiguran Aurora. Bunga nito, nagbabala ang Pagasa sa mga naninirahan sa mga mabababang lugar sa gilid ng bundok dahil sa posibleng banta ng flashfloods at landslide. (Angie dela Cruz)