Obrero isinalvage, itinapon sa Pasay

MANILA, Philippines - Isang obrero na sangkot sa patung-patong na kaso ang pinaslang saka parang hayop na itinapon lamang sa isang es­ki­nita ang bangkay nito, kama­kalawa ng gabi sa Pasay City.

Kinilala mismo ng kaniyang mga kaanak ang biktima na si Rajan Benedicto Cresini, 34, ng Apelo Cruz St., Ma­libay, ng na­banggit na lungsod.

Batay sa ulat ng pulisya, dakong alas-10:35 ng gabi nang matagpuan ng security guard na si Felix Malongo, 38, ang bang­kay ng biktima na duguang nakahandusay sa isang bang­keta sa tapat ng binabantayang establismiyento sa E. Rodri­guez St., EDSA, Malibay.

Nabatid na ang biktima ay nagtamo ng anim na tama ng saksak sa dibdib, nakatali ang dalawang kamay sa likuran, may pasak ang bibig at naka­balot ng puting packaging tape ang mukha nito. Bukod sa mga tama ng sak­sak, nakapatong sa dibdib ng biktima ang isang malapad na karatula na nagsa­saad ng “hold-upper ako, huwag ninyo akong tularan.”

Ayon sa isang saksi na iti­natago sa pangalang “Jason”, bago natagpuan ang bangkay ng biktima, isang kulay pulang lumang kotse ang pumarada sa naturang lugar at makalipas ang ilang minuto ay agad na huma­rurot ang naturang sasakyan hanggang sa madiskubre ang bangkay ni Cresini.

Lumalabas naman sa re­kord ng Criminal Investigation & Record Section ng Pasay City Po­lice, ang biktima ay may naka­bimbin na mga kasong robbery & physical injuries noong July 12, 1997; Violation of Revised Penal Code 202 noong January 14, 1999; Threat & BP-6 noong June 11, 2003; Theft and BP6 noong February 23, 2004; Robbery and illegal possession of deadly weapon noong October 26, 2005 at Robbery with multiple serious physical injuries noong August 7, 2007. (Rose Tamayo-Tesoro)