Sigarilyo at bitamina ang tinangay ng hindi pa nakikilalang magnanakaw sa locker ng Oreta Sports Complex sa Malabon City kahapon ng umaga.
Sa pahayag ni Jessie Tuazon, 47, caretaker ng sports center sa F. Sevilla Boulevard ng lungsod na ito, alas-6:00 ng umaga nang mapansin niya na bukas ang mga locker ng mga tennis player.
Agad na pinagbigay alam nito sa mga pulis ang insidente hanggang mabatid na kinuha ng suspek ang isang kaha ng sigarilyo ni Ronnie Gozon habang halagang P450 ng mga vitamins naman ang nawala kay Pilo Villanueva sa kani-kanilang locker. (Lordeth Bonilla)
Monitor tinangay
Pasok sa piitan ang isang binata habang nakatakas naman ang dalawang hindi pa nakikilalang kasama nito nang tangayin ang monitor ng isang videoke machine sa Malabon City kahapon ng umaga. Nakilala ang nadakip na si Oliver Carillo “alias Tsukoy”, 26, ng Rimas Road, Potrero ng lungsod na ito. Sa imbestigasyon ni PO3 Robert Miclat, alas-5 ng umaga nang bitbitin ng mga suspek ang 29 inches Sony television ng Kims Canteen sa Mac Arthur Highway, Potrero. (Lordeth Bonilla)
Tindero nagbigti
Isang 16-anyos na tindero ng prutas na si Jerome Laure ang nagpatiwakal sa pamamagitan ng pagbigti sa kanyang sarili sa banyo ng bahay nito sa Carcet St., Quiapo, Manila kahapon ng madaling-araw. Wala pang nakukuhang impormasyon ang imbestigador sa posibleng motibo sa pagpapatiwakal ng biktima. (Ludy Bermudo)