Libu-libo dadagsa sa anti-chacha rali
Inaasahang libu-libo ang dadalo sa isasagawang anti-chacha rally ngayon araw na ito sa lungsod ng Makati.
Kaugnay nito isinailalim muli sa pinakamataas na alerto ang National Capital Region Police Office (NCRPO) dahil sa naturang rali. Sinabi ni NCRPO Chief Director Leopoldo Bataoil, maliban sa pagmomobilisa sa Task Force Manila Shield, pupulungin nito ang mga rally organizers upang matiyak ang seguridad sa naturang demonstrasyon.
“The NCRPO is on full alert, we will activate Task Force Manila Shield for anti-cha cha rally. We have enough security preparations,” pahayag ni Bataoil.
Kasabay nito ay may 1, 300 pulis ang idedeploy sa anti-chacha rally upang matiyak ang seguridad sa Makati City.
Inihayag din ng opisyal na sapat ang kapabilidad ng Civil Disturbance Management Units na haharap sa mga demonstrador at nakahanda rin ang Kampo Crame na magpadala ng karagdagang puwersa sakaling kailanganin.
Nabatid na ang kampo ni dating Pangulong Joseph “Erap” Estrada o ang Puwersa ng Masang Pilipino ay magpapadala sa anti-chacha rally ng 5,000 delegado. Bukod sa mga militante at hanay ng simbahan, nagpahayag na rin ang ilang mambabatas buhat sa oposisyon na dadalo sa anti-chacha rally.
- Latest
- Trending