Police visibility sa mga korte, iginiit

Upang maiwasan ang patuloy na paglala ng mga karahasang nagaganap sa mga hukuman sa Metro Manila katulad ng nangyari kay dating Sapang Dalaga Mayor Rey Yap, inirekomenda ng isang hukom ang pagdadagdag ng police visibility sa mga korte.

Ito ang naging rekomendasyon ni dating SPO4 Jaime Santiago na ngayon ay isa nang hukom sa Manila Regional Trial Court (RTC) sa ginanap na pulong ng mga opisyal ng hudikatura na pinangu­nahan ni Associate Justice Presbitero Velasco Jr.

Kabilang din sa mga dumalo sa pagpupulong ang mga kinatawan buhat sa iba’t ibang mababang hukuman, Korte Suprema, Sandiganbayan, Court of Appeals (CA) at Court of Tax Appeals. Tinalakay sa naturang pagpupulong ang ipatu­tupad na security measures sa mga hukuman ma­tapos ang sunud-sunod na barilan at hostage-taking sa mga korte.

Ayon kay Santiago, ang pagkakaroon umano ng nakatalagang police na magbabantay sa mga korte habang nagkakaroon ng pagdinig ay siyang magiging hadlang sa sinumang nagnanais o nagbabalak na maghasik ng tensiyon at karahasan sa mga korte.

Ang naturang pagpupulong ay ginawa matapos ang pagpaslang kay Yap noong Martes sa loob mismo ng RTC habang dinidinig ang kaso nito. (Gemma Amargo-Garcia)