Sunog sa CA: Records ng mga kaso naabo

Posibleng  maa­apektu­han ang mga kasong naka­binbin sa Court of Appeals (CA) matapos na tupukin ng apoy ang isang tanggapan ng mahistrado dito kahapon sa Maria Orosa St., Ermita, Maynila.

Ayon kay Manila Fire­marshal Pablo Cordeta,  ang sunog ay nagsimula pasado alas-12 ng umaga   sa kuwarto ni Second Division Senior member Associate Justice Edgardo Sundiam.

Naapula naman ito dakong ala-1 ng hapon. Na­katulong naman ang ma­lakas na pag-ulan kaya agad na napatay ang sunog.

Nadamay   sa naturang sunog ang ilang kalapit-kuwarto  ni Sundiam kung kaya’t minabuti naman ni CA Presiding Justice Ru­ben Reyes na pauwiin na lamang ang mga kawani nito.

Inaasahan naman na maaapektuhan ang mga kasong hawak ni Sundiam dahil sa pagkatupok ng mga rekords ng kaso dito.

Samantala, habang isinusulat ang balitang ito ay patuloy na iniimbes­ti­gahan ni Cordeta ang sanhi ng naturang sunog.

Itinanggi naman ni Asso­ciate Justice   Sun­diam na nagmula sa kan­yang kuwarto ang apoy na tumupok sa bahagi ng CA  building at umabot sa ika-limang alarma.

Ayon kay Sundiam, wala umano siyang naki­tang apoy sa loob ng kan­yang kuwarto ng siya ay pumasok dito kundi tanging mga usok lamang na nag­mumula sa kisame.

Hinihinala naman na faulty electrical wiring ang naging sanhi ng sunog ma­tapos na makita ng isang security guard na nag-spark umano ang  aircon ni Justice Sundiam. (Grace Amargo-dela Cruz)