Maniobra sa impeachment trial
Nipasangil ang House prosecutors nga gikopya sa mga abogado ni Bise Presidente Sara Duterte ang ilang mga testigo ug mga ebidensiya aron sa paglawgaw ug paglangay sa impeachment trial. Pero wala silay mahimo pagbaraw sa depensa atol sa pre-trial conference.
Dili silang kabuot sa kampo ni VP Sara kinsa ang ilang ipatawag nga mga saksi ug unsay ilang ipakita nga mga ebidensiya. Bugtong mahimo sa prosecutors mao ang pag-awhag sa Senate secretary, clerk sa impeachment court, pagsugo sa depensa pagpasabot unsay kapuslanan sa kada saksi ug dokumento nga ilang gilista.
* * *
Ang kadaghan sa mga testigo ug mga dokumento ni VP Sara gipanghinaot nga makatabon sab sa kakuwang og tubag sa mga pasangil batok niya. Nanghinaot nga gawas sa kalangay mahunong ang husay aron dili kaablihan ang iyang bank accounts.
Taphaw ang rason nga wala sila mangopya sa prosekusyon kay nagdungan og sumiter sa ilang pretrial briefs niadtong Hunyo 1. Kay nahibawo na sila sa mga saksi ug mga ebidensiya sa prosekusyon sukad sa impeachment proceedings sa House Justice Committee hangtod sa articles of impeachment nga gisumiter sa House.
* * *
Mahimong kuwestiyunon sa prosekusyon ang kapuslanan sa mga saksi ug mga ebidensiya ni VP Sara atubangan sa senator judges atol sa impeachment trial. Samang katungod mahimong gamiton ni VP Sara pagkuwestiyon sab sa lista sa mgaa saksi ug ebidensiya sa prosekusyon.
Ang moulbo nga lalis makadugang og wala kinahanglana nga komplikasyon sa husay. Nga kalikayan unta. Kon napangitaan pa og paagi atol sa nagpadayong pretrial ang pagbaraw sa tinuyo nga pag-doble sa lista sa mga testigo ug mga ebidensiya.
* * *
Manguros na lang tang daan. Kon nalangay ang pretrial conference, nga mahuman na unta niadtong Hunyo 18 pero gikahadlokang mainat hangtod sa Hunyo 25, unsa pa kaha ang tinuod nga impeachment trial?
Salamat na lang nga napapas nang mayoriya sa mga alyado ni VP Sara sa impeachment court. Bisan sa tanang maniobra nga pasiugdahan, apil ang pag-apura sa Korte Suprema pagluwat og temporary restraining order batok sa husay o bisan batok na lang sa pag-abli sa iyang bank accounts, ang bag-ong majority bloc may igong numero pagseguro nga mapakita ang labing importanteng mga saksi ug mga ebidensiya.
* * *
- Latest
