Minyo ang uyab

Dear Tito Miguel,

Good day Tito Miguel! Ako diay si Jerwin 27 yrs old na. Akong patambagan nimo Tito mahitungod ani akong lovelife. Naa koy uyab si Maria. Twenty-eight years old, minyo pero bulag na sila sa iya bana. Love kaayo namo ang usa'g-usa, Tito. Unsa amo angay buhaton, Tito Miguel? —Jerwin 

Jerwin,

Depende unsay plano ninyong  duha para sa inyong ugma. Kun naa moy plano magpakasal, kinahanglan limpyohon usa sa imong uyab iyang napakyas nga kaminyuon sa pamaagi nga legal.

Konsulta mo’g abugado kun duna bay igong rason nga iyang kaminyuon mahimong mapa-annul. Kay samtang sila kasado sa papel, inyong pagmahal sa usa’g-usa dili mahimong legal, gawas kun iyang bana motaliwan. Karon kun wala moy plano magminyo ug igo ra magpuyo, mahimo man tutal wala may agrabyado kay buwag na man sila. Wa ka maghisgot kun duna ba sila’y anak, kinahanglan sad sila konsiderahon sa di pa mo moambak.

Gawas sa hisgotanan sa anak, walay seguridad inyong relasyon kun imong uyab nahigot sa iyang kaminyuon. Gani mahimo pa mo samok-samokon sa iyang bana kay sa balaod, sa imong uyab siya nagpabilin nga dunay katungod.  Taas-taas raba ang proseso sa annulment, busa kinahanglan lihokon na sa imong uyab. Kun kini masugdan na, wala moy laing buhaton kun dili ang resulta paaboton, samtang inyong paghinigugmaay magpadayon. Mahimo sad nimo pahimuslan ang higayon nga samtang nagpaabot mo, masuwayan ug masukod unsa kahingkod inyong gugma sa usa’g-usa. 

Busa dili kaayo tanto dako imong suliran, kay ang annulment igo ra nila sugdan, samtang kamo maghuwat nga naa sa tagsa-tagsa nga kiliran, gawas tingali sa gastohanan. Apan kinahanglan inyo kini piyongan aron imong uyab malingkawas sa kagahapong napakyas ug kamo manimpalad nga sa ila dili maparehas. —Tito Miguel

Magpatambag ka? I-text kang Tito Miguel: 0998-581-5856