Sukod sa tawo
Alas otso y medya sa buntag. Sulod sa husgado. Wala pa magsugod ang bista. Tua pa sulod sa chamber si Judge Dante Into. Daghan nang mga abogado sa lingkuranan sa mga abogado.
Diha na si Atty. Rudy Gabucan, 60 anyos, si Atty. Max Cordova, 78 anyos, si Atty. Arman Taga, 30 anyos ug uban pang mga abogado. Nanglingkod na sila sa mga lingkuranan dikit sa lamesa nga taas. Nagsikit og lingkod ang tulo ka abogadong unang nahisgutan. Sa pinakadaplin sa wala, si Rudy. Sa tunga si Arman. Sa pinakadaplin sa too, si Max.
Kasamtangang nagbasa og Banat News si Arman. "Oy! Patay na man diay si Judge Saniel!" ni Arman nga nagtutok sa obituary. Nilingi siya ni Rudy. "Kinsay nagpahibawo nimo?" ni Rudy. "Karon lang nako nabasahi, sa mantalaan" ni Arman. "Si Atty. Glen Escobo, namatay sab kono" timang ni Max. "Si Judge Saniel, wa pay setenta. Si Glen, sobra otsenta na" ni Rudy. "Wa na sa edad panyero. Way bata o tiguwang sa kamatayon. Lain lain gyud og sukod ang tawo" ni Max.
"Nganong nakaingon ka ana, panyero?" ni Arman. "Usa na lay kidney nako. Operado na ko. Pero piskay pa man akong paminaw. Taas pa tingale akong sukod" ni Max. "Gilupig nimo ang kompleto og kidney" ni Arman. "Mutoo gyud ko anang lainlain og sukod. Sa panultihon pa ni JesusCristo, "Ang nauna naulahi. Ang naulahi nauna" ni Rudy. "Unsa may ipasabot ana panyero?" ni Arman ngadtong Rudy. "Kun ikaw nauna og katawo, wa magpasabot nga mauna ka'g kamatay. Kun ikaw ulahing natawo, wa magpasabot nga ulahi kang mamatay. May nauna naulahi. May naulahi nauna" ni Rudy. Daw nibilib si Arman ug Max ni Rudy.
"Applicable na sa tanang kalihokan sa tawo. May nauna'g eskuyla, naulahi'g gradwet. May naulahi'g eskuyla, unang nigradwet" ni Max. "Husto", ni Rudy. "May nauna'g minyo,ulahing nanganak. May naulahi'g minyo, unang nanganak" ni Arman. "Puwede sab" ni Rudy. "May unang nigikan ulahing niabot. May ulahi nigikan unang niabot", dugang ni Rudy. "Busa, lainlain gyud og sukod ang tawo" ni Max. (Kataposan)
- Latest
