Mabudhion

Guwapo ug guwapa si Jeric ug Lyca, maayong pagkatagik sa ilang mga ginikanan. Si Jeric usa ka seaman ug ang iyang asawa anaa lang sa balay uban sa duha nila ka anak.

Nalingaw man sad siya sa iyang sari-sari store. Usa ka adlaw niana nanawag si Jeric sa iyang asawa ug nangumusta, labi na sa mga bata.

“Ok rami Jer, kaluoy sa Ginoo, ikaw? Kumusta wa ba’y chicks nga imong gitan-ogan diha?” ni Lyca nga nangomedya sa iyang bana.

Human sa tulo ka tuig, ni pauli si Jeric sa Pilipinas ug nahinangop kaayo si Lyca uban sa ilang mga anak.

“Mobalik nako’g panakay day Lyca, para maporma ning atong balay?” ni Jeric pa nga naghangad sa atop. “Ikaw ang mag-igo Jer, ikaw may nagdala sa timon, imo man lang mi nga pasahero,” pasiaw ni Lyca.

Nilabay ang pipila ka bulan, tagsa na lang mokontak si Lyca sa iyang bana apan adunay namatikdan si Jeric sa iyang asawa. Samtang mag skype sila, moingon labad ang iyang ulo. May tabi nga miabot kang Jeric.

Usa ka adlaw niana si Lyca ra ug ang panday sa balay kay tua man sa eskuylahan ang mga bata. Natingala ang mga silingan nga mingaw ang  ilang balay.

Maoy nasugat sa mga mata sa ilang silingan si Lyca nga wala’y bra, uban sa maong panday nga nagbarug sa may bintana nga wa kasirad-i.

Dali nga niuli si Jeric sa Pilipinas nga murag wa’ lang kaniya ang maong balita. “Kakalit ba sa pag-uli nimo Jer, imo pa g’yud ko nga gisurpresa ha?,” ni Lyca nga nisabak sa iyang bana.

“Nihapit ra ko day, kay nabaradero man ang among barko. Ugma mobalik ra pud ko,” ni Jeric pa.

Apan giandam ni Jeric ang usa ka banig, katol, tubig ug biscuit nga iyang mabawon. Way kalibutan si Lyca sa mga plano ni Jeric.

“Day, karong gabii nako mogikan balik sa barko?,” ni Jeric nga nitutok sa iyang asawa. “Unsa man ihatod tika!,” matud ni Lyca. “Ayaw na, magabhian ka?” ni Jeric nga mahiubsanon.

Unya dali nga nisuot si Jeric sa luyong bahin sa ilang balay nga labong ang sagbot. Pipila lang ka gutlo nisiga ang iyang kalimutaw kay may lalaki nga nisud sa ilang balay. Nagbutok-butok ang iyang dughan. Iyang gikamang.

“Wa kay angay kabalak-an tua na si Jeric.” ni Lyca. “Tinuod g’yud diay nga nagbudhi ang akong asawa?,” ni Jeric.

Gipatiran ni Jeric ang pultahan. Abtik nga nilayat sa bintana ang lalaki nga wa’y sapot ug mipaingon sa kalibonan. (Kataposan)